O Concello de Redondela organiza na noite de defuntos unha ruta nocturna polos petróglifos de Monte Penide/Mirallo. Un percorrido guiado a cargo do arqueólogo Xurxo Constela na noite do 31 ao 1 de novembro con prazas limitadas, polo que compre inscribirse no teléfono 600 381782.
A visita é gratuíta e está enmarcada no programa de roteiros que organiza o concello co obxecto de dar a coñecer o patrimonio cultural e paisaxístico de Redondela. As seguintes citas, o derradeiro domingo de novembro e decembro, serán a Ventosela e Reboreda.
As visitas nocturnas teñen como atractivo o feito de que se poden observar mellor os petróglifos, dun xeito completamente diferentes que durante o día, xa que a luz focalizada coas lanternas permite observalos con máis nitidez.
Neste 31 de outubro a saída percorrerá os gravados rupestres existentes no xacemento de Monte Penide, onde se atopa unha das maiores concentracións de soterramentos tumulares de España.
