Hoxe é Mércores 27 de Outubro de 2021
Stations
NOTHING FOUND!
Current listeners: 
Peak listeners: 

Un novo verquido de Aucosa causa alarma en Arealonga

AucosaPantalan

Na tarde de onte os veciños de Chapela volveron denunciar un verquido procedente de Aucosa, empresa situada no litoral de Cabanas e que se dedica á fabricación de fariñas e aceites de peixe. A mancha, visible desde moitos puntos da ría, acaparaba unha longa extensión que chegaba ata a praia de Arealonga “cun cheiro insoportable”, sinalan as testemuñas. A asociación de veciños e afectados pola planta de Aucosa denunciaron esta nova vertedura ao servizo do 112. A Plataforma en Defensa de Enseada de San Simón leva anos denunciando os verquidos e malos cheiros procedentes de Aucosa, e esixen a paralización da actividade desta fábrica “polos seus reiterados incumprimentos da normativa ambiental”.

Un técnico da concellería e Medio Ambiente de Redondela desprazouse ao lugar para recoller mostras do verquido que serán analizadas e comparadas coas do pasado 26 maio, cando se produciu outra vertedura de grandes dimensións. O concelleiro, Roberto Villar, lembra que desde a administración local están a facer estas labores de control “malia non ter ningún tipo de competencia”.

Roberto Villar, concelleiro de Medio Ambiente

Villar reclama unha vez máis á Xunta de Galicia que asuma a súa responsabilidade e envíe algún inspector á factoría “que está a provocar verteduras na ría e cheiros pestilentes practicamente a diario”. O edil afirma que as medidas anunciadas pola empresa e a propia Consellería de Medio Ambiente para reducir os cheiros “non tiveron ningún efecto”. Asegura que a situación, lonxe de mellorar, “é cada vez peor”. A contaminación afecta non só a Redondela, senón que se estende tamén ao litoral de Vigo, Vilaboa e Moaña “afectando a milleiros de veciños da ría”

Villar reclama á Xunta de Galicia que asuma as súas competencias e faga inspeccións a Aucosa

Colectivos veciñais, sociais, confrarías e as agrupacións políticas de BNG, PSdG e AER demandaron á Xunta revisar de oficio a Autorización Ambiental Integrada desta factoría “para non prorrogala”. O colectivo de afectados insiste en que estes verquidos “son motivo máis que suficiente para ordenar o cese da actividade de Aucosa, xa que non pode facer verteduras á ría”.

As redes sociais enchéronse onte de fotografías e vídeos do verquido denunciando a contaminación de Aucosa
Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *