Hoxe é Venres 18 de Xuño de 2021

Reclaman dúas prazas na escola unitaria de Cesantes para irmáns menores

UnitariaFamilias

Dúas familias, de Cesantes e Redondela, reclaman á Consellería de Educación que incremente en dúas prazas a matrícula na Escola Infantil San Pedro de Cesantes. Andrea Pazos e Corina Estévez son as nais de Julen e Gonzalo, respectivamente. Os pequenos cumprirán 3 anos a finais deste 2021, e as familias contaban con poder matriculalos para o próximo curso na escola unitaria de Cesantes, onde xa están escolarizados os seus irmáns maiores. Este centro oferta un total de 20 prazas para alumnos de Educación Infantil, de entre 3 e 6 anos. O próximo curso dispoñen dunha única praza libre para novas matrículas. A sorpresa de Andrea e Corina chegou cando se publicou o listado oficial de alumnos admitidos “e o único neno que entra ten cero puntos”. Xa presentaron unha reclamación ante o servizo de inspección da Consellería de Educación o pasado 28 de abril “e aínda non temos resposta” denuncian. As familias demandan que se incremente a ratio con dúas prazas máis para matricular aos nenos “que teñen a máxima puntuación por ter aos irmáns na mesma escola e ser veciños do municipio”. Esta demanda conta co apoio da ANPA do centro e tamén das mestras.

Corina e Andrea reclaman praza na EI San Pedro de Cesantes para os seus fillos menores

Mañá venres está previsto que se publique o listado definitivo de alumnos. No caso de que os seus fillos non estean incluídos seguirán dando a batalla. Descartan escolarizalos noutro centro diferente ao que van os seus irmáns maiores, Javi e Elena. Andrea, que está embarazada e nunhas semanas dará a luz ao seu terceiro fillo, sinala que a situación é “indignante”. Non entenden a negativa da Consellería a facer unha excepción e aumentar a ratio en dous alumnos “como se fai en moitos outros casos”, xa que contan co apoio de toda a comunidade educativa.

As familias rexeitan escolarizar aos nenos nun centro diferente ao dos seus irmáns maiores
Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *