Hoxe é Mércores 25 de Novembro de 2020

Actividades escolares, obradoiros, teatro e música para conmemorar o 25N en Soutomaior

RR_Noticias

O Concello de Soutomaior vén de presentar o seu programa de actos co gallo da celebración do Día Internacional contra a Violencia de Xénero o próximo 25 de novembro. A campaña contará con actividades nos centros escolares, obradoiros, teatro e un concerto do grupo Cinta Adhesiva.

O alcalde de Soutomaior, Agustín Reguera, e a edil de igualdade, Cristina González, fixeron pública a nova campaña municipal de concienciación titulada “#Imparables”, coa que o Concello pretende “concienciar á poboación sobre a necesidade de afrontar esta secuela social de maneira contundente”, segundo afirmou o alcalde. A campaña terá dúas liñas de actuación, unha primeira que se desenvolverá no Centro de Información á Muller de Arcade, que incluirá varias actividades, e unha segunda liña na que se implicará a todos os alumnos de primaria e secundaria do municipio con actividades no seu centro educativo. O programa escolar levarase a cabo até o próximo día 23 deste mes e pretende continuar o traballo realizado o pasado ano durante o proxecto “E ti que fas pola igualdade?”, no que se abordaban diversos conceptos sobre a igualdade de xénero de forma positiva e desde a propia responsabilidade. Ademais, o 20 de novembro terá lugar a representación teatral “Contamos todas”, da compañía Tropa do Carallo. O espectáculo estará dirixido aos alumnos de bacharelato e combina historias contadas con música en directo para inculcar valores como a igualdade, o respecto e a liberdade. Por último, o 25 de novembro, o Multiusos de Arcade acollerá diversas actividades. Ás 16:30 horas comezarán os primeiros obradoiros con actividades para os máis pequenos e tamén sobre igualdade para homes e mulleres. Ás 19:00 procederase á lectura do manifesto institucional contra a violencia de xénero que abrirá o concerto do grupo “Cinta Adhesiva”. O alcalde de Soutomaior, Agustín Reguera, quixo facer un chamamento para que todos os homes se impliquen “de maneira real” nesta loita, xa que “ser indiferentes fainos cómplices”.
 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *