Hoxe é Mércores 25 de Novembro de 2020

As praias de Redondela, sen regulamento para o seu uso un verán máis

RR_Noticias

Os grupos da oposición obrigaron ao goberno local a deixar enriba da mesa a ordenanza municipal para regular o uso das praias en Redondela. O edil, Miguel Ángel Álvarez, explicou que este regulamente é un requisito “obrigatorio” por parte da axencia que outorga o distintivo de Bandeira Azul. PSOE, AER e BNG coincidiron na necesidade de dar “máis tempo” aos grupos para estudar a proposta do goberno e facer tamén as súas achegas. O edil non adscrito, Enrique Fojo, manifestou que máis importante que ter un regulamento “é ter as praias en bo estado e con bos servizos”. Si se aprobou por unanimidade que o CEIP Santo Paio de Abaixo pase a denominarse CEIP Reboreda, tal como pediu o seu Consello Escolar.

Os areais de Redondela non terán este verán unha ordenanza reguladora sobre o seu “uso e disfrute”, tal como pretendía o goberno en minoría do PP. Trátase dunha norma que, como explicou o concelleiro Miguel Ángel Álvarez, é unha esixencia de Adeac (Asociación de Educación Ambiental e do Consumidor, encargada de conceder o galardón de Bandeira Azul ás praias. O edil de Medio Ambiente explicou que propoñía un regulamento “o máis sinxelo posible”, xa que se manifestou en contra de “regulalo todo”. O documento conta con oito artigos coas normas básicas para o uso dos areais. Establece que a tempada de baño vai do 1 de xullo ao 30 de setembro, período no que realizará o servizo de limpeza diario. Indica que os controis de calidade das augas realizaraos a Consellería de Sanidade, e o Concello informará dos resultados á cidadanía. En canto ao réxime sancionador, establece como infraccións moi graves non respectar a bandeira vermella que prohibe o baño, o incumprimento das balizas de navegación, o varar embarcacións ou a captura e destrución da fauna silvestre. Como graves, establece deixar o lixo, non recoller os excrementos dos animais, acceder con vehículos non autorizados ou practicar pesca na tempada de verán. Os grupos da oposición, que suman maioría, obrigaron a deixar este asunto sobre a mesa. O concelleiro non adscrito, Enrique Fojo, manifestou que máis importante que ter un regulamento sobre o uso dos areais “é ter as praias en bo estado de limpeza e con bos servizos para a cidadanía”. O edil do BNG, Xoán Carlos González, defendeu que unha vez que se elebora o regulamento, este debe definir o mellor posible as zonas de baño, o papel dos socorristas, delimitar o tipo de deportes que poden practicarse e onde, e tamén se está permitida a celebración de festivais no areal. Desde AER Javier Bastos advertiu que, tendo en conta os trámites administrativos, o regulamento non podería en funcionamento ata finais de agosto. Por iso o seu grupo optou tamén por deixalo enriba da mesa para ter máis tempo de estudalo a fondo e facer achegas que poidan mellorar o texto presentado polo goberno local. A socialista Anabel Rey manifestou o acordo do seu grupo co do resto de partidos da oposición, e amosou a súa preoupación por temas de seguridade que non se inclúen no regulamento, como a navegación, a delimitación da zona de baño e os espazos reservados para deportes náuticos. Críticas rexeitadas polo concelleiro de Medio Ambiente, quen advertiu que o regulamento estivo a exposición pública un mes. Lembrou tamén que desde o mes de abril se solicitou á cidadanía que achegasen as súas propostas a través da páxina web do Concello, pero que non recibiron ningunha. Miguel Ángel Álvarez acusou á oposición de estar a poñer trabas á xestión municipal, e lamentou “que non lles preocupe que as praias de Redondela teñan Bandeira Azul”. CEIP Reboreda A corporación local aprobou por unanimidade unha solicitude do Consello Escolar do CEIP Santo Paio de Abaixo. A proposta, que levou ao pleno a voceira do grupo popular Carmen Amoedo, supón o cambio de nome do centro, que pasa a denominarse CEIP Reboreda.

Xoán Carlos González BNG
O edil do Bloque entenden que é preciso definir máis o regulamento nalgúns aspectos dos usos da praia.
Javier Bastos AER
O edil de AER advirte que non haberá tempo para que entre en vigor este verán. Por iso propuxeron deixalo sobre a mesa e facer melloras no documento.
Anabel Rey PSOE
A edil socialista sinala que non houbo tempo suficiente para estudalo e demanda máis regulamento en materia de seguridade para os bañistas.
Miguel Ángel Álvarez concelleiro de Medio Ambiente
O edil popular acusou á oposición de poñer trabas á xestión municipal. Lembra que houbo máis dun mes para facer propostas.
CEIP Reboreda
Carmen Amoedo expuxo a petición do CEIP Santo Paio de Abaixo para o cambio de nome.
Enrique Fojo non adscrito
O edil non adscrito demandou non só un regulamento senón manter as praias en bo estado.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *