A praza do concello acolle o martes ás 19:30 horas a concentración en contra da violencia de xénero correspondente ao mes de abril. Mulleres do Círculo Cultural de Cesantes serán as encargadas de ler o manifesto nesta ocasión. Como símbolo gardarase un minuto de silencio e procederase a colocación dunha lona en contra da violencia de xénero no balcón do Concello dende primeiras horas do día.
Esta iniciativa, ideada e consensuada polo Consello Municipal da Muller no que participan colectivos de mulleres redondelás, partidos políticos e sindicatos, ten como obxectivo aumentar a visibilidade deste tipo de violencia e tamén sensibilizar á poboación sobre que a eliminación destas condutas violentas contra a muller, depende de todas e todos. Tamén se quere mostrar a repulsa da cidadanía redondelá cara a violencia de xénero e o seu apoio a todas as persoas vítimas desta lacra social.
O acto, que se desenvolverá o martes 3 de abril na praza do Concello ás 19:30 horas, incluirá ademais da propia concentración a lectura dun texto que será colleita, neste mes, do Círculo Cultural de Cesantes.
