Hoxe é Martes 24 de Novembro de 2020

Soutomaior sae á rúa en defensa do Verdugo e en contra do transvasamento a Eiras

RR_Noticias

Os veciños de Soutomaior pero tamén de Redondela e Vilaboa sumáronse onte a unha concentración protesta en contra do anunciado transvasamento de auga do río Verdugo ao encoro de Eiras para garantir o abastecemento de auga a Vigo e concellos limítrofes. Dende o BNG anunciaron que a súa representante no Parlamento Europeo, Ana Miranda, dirixirase á Comisión Europea para denunciar que o trasvase podería incumprir a normativa europea de augas pola posible afectación dos recursos hídricos e dos bancos marisqueiros.

Baixo o lema “Trasvase non! Salvemos os ríos! Salvemos os bancos marisqueiros!” centos de veciños saían ao mediodía de onte á rúa na ponte de Comboa para denunciar as nefastas consecuencias que o transvasamento proposto por Vigo e a Xunta de Galicia tería tanto a nivel medioambiental como económico e social ao afectar aos bancos marisqueiros de Arcade e Redondela. De feito, na protesta estaba presente a patroa maior de Arcade Rita Míguez, quen amosou a súa preocupación polos efectos que esta actuación tería para as 200 familias que viven do sector en Soutomaior. Dende o BNG, Manu Lourenzo acusaba ao goberno da Xunta de querer “engadir unha agresión máis a un río sempre maltratado e agredido, polo lume, polo abandono das  concas e agora por un proxecto que lle pretende roubar a auga” Un acto apoiado tamén polo BNG de Redondela cuxo responsable local, Anxo Lusquiños manifestaba a súa oposición “namentras non haxa un estudo que analice cales van ser as súas consecuencias”. Criticaba tamén unha obra que busca dar servizo a Vigo mentres nesa cidade non se establece un consumo racional da auga “queren resolver un problema creando outro aínda máis grave que vai prexudicar aínda máis a enseada de San Simón, unha obra letal para o sector pesqueiro e marisqueiro ao reducir a achega de auga doce a ría”.  

Manu Lourenzo BNG Soutomaior
Denuncia o maltrato continuo ao Verdugo
Anxo Lusquiños BNG Redondela
Reclama un consumo responsable e non actuacións que carecen de estudo de impacto

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *