Hoxe é Martes 27 de Outubro de 2020

A declaración de San Simón como Illa da Memoria abre a semana de actos de Reparación da Memoria

RR_Noticias

Trátase dunha campaña promovida polos colectivos de todo o país que forman a Iniciativa Galega pola Memoria para recoñecer o valor simbólico da illa como cárcere e campo de concentración durante a represión franquista. Presentacións literarias, recitais poéticos, mesas de debate e concertos completan o programa organizado dende a Deputación de Pontevedra e que se vai desenvolver durante toda a semana ás 20:30 horas no Pazo Provincial.

“A declaración de San Simón como Illa da Memoria supón darlle un recoñecemento para que todo o que alí sucedeu sexa coñecido pola cidadanía e para dignificar a loita das persoas e dos seus familiares que sufriron a represión”. Con estas palabras explicaba o deputado de Cultura e Lingua, Xosé Leal, a razón de ser da primeira das xornadas que a Deputación de Pontevedra organiza con motivo da Reparación da Memoria Histórica. Así, baixo o epígrafe “San Simón. Illa da Memoria” proxectouse o documental “Aillados” da Asociación O Faiado da Memoria que recolle testemuñas de como era a vida na illa cando foi convertida en campo de concentración e cárcere. Tras a proxección tivo lugar un pequeno coloquio no que participaron, ademais do deputado de Cultura e Lingua,  Antón Caeiro, da Asociación O Faiado da Memoria, e Matías Rodríguez da Torre, da Iniciativa Galega pola Memoria, organización que impulsa a campaña para que San Simón acolla actividades relacionadas co seu pasado durante a guerra e a posguerra.
Na súa intervención Antón Caeiro lembrou “Aillados” trata de difundir “as historias de San Simón, e abrilas a toda a poboación e darlle valor ás persoas que participaron para que sexa coñecidas e recoñecidas con dignidade”. Precisamente o recoñecemento do valor simbólico de ter sido cárcere e campo de concentración centra a campaña da Iniciativa Galega pola Memoria para que San Simón sexa declarada polo goberno galego “Illa da Memoria”. Matías Rodríguez da Torre explicou que “posto que o goberno da Xunta non ten políticas sobre a Memoria Histórica temos que promovela desde a sociedade civil”. Neste sentido, lembrou que a Iniciativa Galega pola Memoria lanzou a mencionada campaña o pasado 16 de xullo para acadar que San Simón sexa recoñecida con nome “Illa da Memoria” e que “se realicen nela actividades de recoñecemento ás vítimas do franquismo e que de realizarse outro tipo de actividades culturais estas garden un respecto absoluto polo pasado simbólico da Illa. Rodríguez da Torre fixo un percorrido polos dous meses e medio que leva activa a campaña e que leva numerosas adhesións de persoas que gravaron vídeos apoiando e explicando a reclamación da IGM, e máis de 3.000 sinaturas na plataforma change.org solicitándolle ao presidente da Xunta a mencionada declaración para a illa.
Programa
Dentro do programa da Deputación hoxe martes terá lugar a presentación do libro “Memorias de sal e terra. O ensino no concello de Marín (1867-1940), da autoría de Celso Xavier Milleiro Sánchez e Xosé Manuel Moreira Docampo e editado pola Editorial da Deputación de Pontevedra.
O mércores será a quenda da poesía cun recital a cargo de poetas como Míriam Ferradáns, Xosé María Álvarez Cáccamo, Lucía Novas, Elisabeth Oliveira, Marta Dacosta e Luis Chapela. O xoves chegará a exposición “Rexas. Mulleres baixo o terror franquista” ao Pazo provincial tras a súa itinerancia por diversas comarcas da provincia, nun acto no que Montse Fajardo guiará un coloquio arredor da mostra con familiares de vítimas represalidas da comarca de Pontevedra. Finalmente, o programa de actos rematará o venres cun concerto da Orquestra de Cámara Galega.
 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *