O proxecto de recuperación, conservación e mantemento do cemiterio, cuxa redacción foi financiada a través dunha subvención da Deputación de 6.900 euros, contempla unha rehabilitación completa deste emblemático lugar que data do ano 1.833. A súa realización suporía un investimento total de 285.000€ que a Concellería de Cultura proporá que sexa financiado cos fondos europeos do plan “Redondela 2020”.
Este cemiterio, de grande valor artístico, conta con importantes tallas nas sepulturas e monumentais panteóns. Representa tamén un importante valor histórico ao atoparse soterrados persoeiros sobranceiros de diferentes épocas.
Os traballos que recollen o proxecto adecuarán a contorna e dotarán a entrada deste camposanto, pechado dende 1988, de accesibilidade. Recuperaranse os muros de peche xa que nalgunhas zonas se atopan deteriorados; no interior repararase tanto o pavimento como as zonas axardinadas; impulsaranse traballos de reforma da cuberta da capela e a eliminación no interior do morteiro para deixar a vista a cadeirado de pedra e, tamén, se restaurarán aqueles elementos que teñan valor patrimonial e artístico.
En maio deste mesmo ano o pleno do concello aprobaba por unanimidade unha moción presentadas polos socialistas na que alertaban do estado de deterioro do cemiterio e se recollían unha serie de medidas de cara a recuperar dito espazo.
Roterio na Noite de Defuntos
Por outra banda, co obxecto de dar a coñecer este patrimonio, o Goberno local organiza na vindeira semana na noite de defuntos un roteiro no que se explicarán todos os elementos a destacar e se falará dos personaxes históricos que se atopan alí soterrados. Un roteiro cun máximo de 25 persoas no que cómpre inscrición previa na oficina de turismo ou no teléfono 986401713.
