Hoxe é Mércores 28 de Outubro de 2020

O Parlamento aproba a creación de sendas verdes entre Pontevedra e Arcade e Chapela e Vigo

RR_Noticias

O Parlamento aprobou por unanimidade solicitar a Fomento a proposta do BNG para transformar en vía peonil e ciclista a vía férrea en desuso entre Pontevedra e Arcade. Igualmente foi aprobada, a través da incorporación dunha emenda, facer este mesmo aproveitamento entre Chapela e Vigo. A iniciativa permitiría darlle un novo uso a unha vías polas que non pasa un tren dende hai cinco anos.

O deputado por Pontevedra, Luís Bará, foi o encargado de defender a proposición non de lei co fin de solicitar ao Ministerio de Fomento a reconversión en vía verde para uso peonil e ciclista dos treitos da antiga vía férrea entre Pontevedra e Arcade actualmente en desuso. Ademais, o parlamentario tamén solicitaba colaborar cos concellos de Pontevedra, Soutomaior e Vilaboa, así como Redondela e Vigo e coa deputación de Pontevedra, na redacción dun proxecto construtivo e no estudo dunha estrutura administrativa para a xestión e conservación desta vía que discorre por estes concellos.
Bará explicou que a transformación desta antiga vía nunha senda verde para uso peonil e ciclista permitiría crear unha nova infraestrutura de aproximadamente 10 km, aproveitando o trazado da vía férrea agora en desuso. No caso do treito entre Arcade e Figueirido, o aproveitamento do antigo trazado sería doado xa que discorre completamente separado do novo trazado do TAV. No caso do treito Figueirido-Pontevedra caben dúas opcións: transformar en vía verde a antiga vía férrea, ou aproveitar as vías de servizo paralelas ao trazado do Tren de Alta Velocidade.
O deputado do BNG tamén se referiu a dous treitos entre Pontevedra e Vigo dos que dixo “son perfectamente reconvertibles”, un entre Figueirido e Arcade con 5Km e 8Km e outro entre Chapela e Vigo.
En cinco anos, argumentou Bará, “non pasa ningún tren nin vai pasar” por esas vías, polo que é necesario dar utilidade a estes espazos con alternativas viables para a mobilidade do transporte “como a que hoxe defendemos aquí”.
A vía verde permitiría aos usuarios e usuarias desprazarse dende Paredes, Arcade, Figueirido ou Vilaboa “en tempos razoables e, con bo tempo, mesmo camiñando”, concluíu.
 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *