Os socialistas aseguran que existe un incumprimento reiterado da normativa que debe regular o funcionamento das terrazas para garantir a convivencia dos locais de hostalaría e os viandantes. Denuncian que en moitos casos a colocación de mesas e cadeiras na rúa obstaculizan o tránsito peonil ou se supera a ocupación do 50% do espazo público. Critican ao goberno local por non facer cumprir unha ordenanza que foi aprobada hai máis de 4 anos sendo “a voceira do PP, María Carmen Amoedo, a primeira en incumprir a normativa das terrazas promovida polo seu propio partido”.
Explican dende o PSOE que no 2013 aprobouse a ordenanza de terrazas promovida polo PP pero que despois de máis de 4 anos, dita normativa segue sen cumprirse debido á falta de control e de xestión do Goberno Municipal do PP.
A ordenanza de terrazas establecía uns mínimos para a convivencia dos locais de hostaleiros e os viandantes como: a obriga de recollida das mesas, cadeiras e parasoles ao interior do local tras o peche do local sen quedar amontoados na rúa; non obstaculizar o tránsito peonil, nin de entrada e saída de casas e locais comerciais; a prohibición de instalacións e uso nas terrazas de aparatos audiovisuais que produzan emisións acústicas de calquera tipo, a non superación de ocupación do 50% da superficie total da praza pública… Normas todas elas que “están a incumprirse , facendo que moitos veciños e veciñas trasladen as súas queixas polas molestias” segundo denuncian os socialistas. Uns incumprimentos que afectan de xeito especial a aquelas persoas que levan carros de bebés ou que teñen diversidade funcional.
Conclúen afirmando que “é entendible o malestar ante a normativa xa que existe un mal exemplo por parte do Goberno Municipal do PP coa súa propia voceira incumprindo a normativa das terrazas no seu local hostaleiro”.
