A VI Batalla de Rande congrega aos mellores nadadores de España en augas abertas

Catro dos sete triplo coroas de España participarán na competición que se celebra este sábado entre as Illas Cíes e San Simón. Unha das probas máis esixentes de España con 27 quilómetros de percorrido que congregará a 77 nadadores nacionais e estranxeiros. A proba comezará ás nove da mañá e desenvolverase en dúas fases. A primeira será controlada e os nadadores dividiranse en catro grupos dependendo do ritmo de nado. Na segunda fase, a partir do quilómetro doce, será libre pero os participantes terán que pasar por cada un dos sete puntos de avituallamento.

Dende a organización prevén que os primeiros participantes comecen a chegar a Illa de San Simón ás catro da tarde e os últimos ás seis, establecendo como límite dez horas na auga. Como novidade, este ano cada nadador levará unha boia con sistema GPS que permitirá no só garantir a súa seguridade senón seguir a súa traxectoria a través da páxina web da Batalla de Rande. Dende a organización, Aitor de Luis, destacaba o alto nivel dos competidores entre os que se atopan catro dos sete triplo coras de natación, recoñecemento que outorga a Asociación Mundial de Augas Abertas a aquelas persoas que completasen as probas de longa distancia do Canal da Mancha, o Canal de Catalina e a Manhattan Island Marathon Swim. Participarán na proba o vasco Jaime Caballero, dobre triplo coroa, a gaditana Selina Moreno, o alacantino Jorge Crivilles e o marbellí Javier Mérida. Unha proba dura que supón un gran desafío para os participantes e que sitúa a Redondela como un referente neste tipo de competición a nivel internacional ademais de fomentar esta práctica deportiva nunha espazo de gran beleza paisaxística e que conta cunhas condicións óptimas para todo tipo de deportes acuáticos como destacaba o concelleiro de Deportes, Julio Mougán, que confía en que este tipo de probas promovan as posibilidades que ten o municipio neste ámbito deportivo.