Partido correspondente á cuarta xornada da liga na Autonómica Sur disputado no pavillón municipal de Chapela cunha boa entrada de afeccionados. Primeiro derbi da tempada que rematou cun 3-6 a favor do Redondela. Mal resultado para o Campito na súa visita ao campo do Abetos cun partido que deixaba un 4-2 no marcador.
O Redondela FS visitaba o pavillón de Chapela e saía a polo partido logrando xa aos catro minutos do inicio poñerse por diante no marcador. Moita presión por parte dos visitantes que lles permitía irse ao descanso cun 0-3 no marcador. A segunda parte comezou coa mesma dinámica aínda que o Arealonga lograba meterse no partido pero sen chegar a poñer en perigo a vitoria do Redondela que se facía co encontro con ese definitivo 3-6.
O outro equipo de Chapela, o Campito tampouco lograba facerse coa vitoria na súa visita ao campo do Abetos. Os puntos quedábanse na casa dos locais logo de rematar o partido cun resultado de 4-2.
O Redondela mantense na terceira praza da categoría e recibe o sábado no pavillón novo ao Tui, partido que se disputará ás 16.15 horas.
O Campito situado na penúltima praza, tentará facerse coa vitoria nun partido que disputa na casa, onde recibe ao Ourense. Por último, o Arealonga desprázase a pista do Gondomar.