Hoxe é Mércores 28 de Outubro de 2020

Nova lonxa, novos retos

RR_Noticias

As novas instalacións da lonxa de Cesantes supoñen unha gran mellora nas condicións de traballo de mariscadoras e mariñeiros. O edificio, que xa entrou en funcionamento, inclúe un espazo para subastas, vestiarios, oficinas e almacén. Agora o obxectivo da Confraría é rexenerar a enseada coa substitución do actual peirao por outro sobre pivotes que permita o movemento das correntes mariñas.

A Conselleira de Medio Rural, Rosa Quintana, visitou esta mañá as instalacións e anunciou que se porá en marcha un estudo técnico para avaliar “as posibles actuacións” a levar a cabo na enseada. Recoñeceu que esta zona, de fondo de ría, acumula moitas algas e lodos que prexudican a pesca e o marisqueo, pero advertiu tamén que calquera actuación que se faga no litoral debe contar “cun estudo previo”, xa que afecta ás correntes mariñas. Quintana destacou que a obra prioritaria en Cesantes era a nova lonxa, que xa está en funcionamento. Estas instalacións melloran a trazabilidade dos produtos do mar e tamén as condicións de traballo dos profesionais do mar do municipio. A nova lonxa, que contou cun orzamento de 608.000 euros, inclúe no mesmo complexo a propia lonxa de peixes, os vestiarios dos mariscadores, as oficinas da confraría e os locais para almacén que garanten a correcta xestión e calidade dos produtos. Ademais o edificio conta cunha pasarela que permite aos visitantes observar a actividade da lonxa. O alcalde, Javier Bas, amosouse moi satisfeito co resultado da nova lonxa, moi necesaria para os traballadores do mar de Redondela, que tamén participaron no proxecto coas súas achegas. O novo edificio vai permitir tamén que o Concello o integre no programa de visitas que está a celebrar cos escolares de Redondela dentro do programa de promoción da Enseada de San Simón. O obxectivo do goberno local é poñer en valor o litoral redondelán e a súa riqueza natural, paisaxística e como fonte de recursos. Deste xeito as visitas á nova lonxa sumaranse ás que xa se realizan ao Mercado Municipal. Agrupación de Mariscadoras O edificio xa está a ser utilizado desde hai varias semanas pola Agrupación de Mariscadoras de Redondela, que suman case un cento de traballadoras. A presidenta, Alicia Álvarez, amosouse moi satisfeita xa que por fin son realidade unhas instalacións polas que levaban loitando “moitos anos”. Agora o que demandan as mariscadoras é maquinaria que faga “máis levadeiro” o traballo de limpeza de algas e lodos na enseada. Para iso solicitaron á Consellería a dotación dun tractor para esta tarefa. Este ano a axuda foilles denegada, pero confían en que poida entrar no plan de axudas do próximo ano 2015, que conta con fondos da Unión Europea.  

Rosa Quintana Conselleira do Mar
Para a Xunta a construción da lonxa era prioritaria para poder subastar e comercializar o produto.
Estudos técnicos
A Consellería porá en marcha os estudos técnicos para resolver os problemas do fondo da ría.
Javier Bas alcalde
A nova lonxa permitirá acoller visitas de escolares para que coñezan o sector e a riqueza dos produtos do mar de Cesantes.
Alicia Álvarez presidena da Agrupación de Mariscadoras
As mariscadoras amósanse moi satisfeitas coas novas instalacións.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *