Hoxe é Venres 23 de Outubro de 2020

Os veciños aseguran que en Redondela existe unha gran demanda dun Centro de Día público

RR_Noticias

Veciños e colectivos redondeláns non saen do seu asombro logo de facerse público que o goberno galego estuda cambiar o uso das instalacións do Centro de Día para maiores de Cesantes, alegando que non existe demanda deste servizo na zona. Afirman que este centro é unha necesidade “prioritaria” para a sociedade redondelá, e urxen a súa apertura.

Con sorpresa e malestar vive a veciñanza o anuncio da Secretaria Xeral de Política Social Coro Piñeiro, quen confirmou no Parlamento de Galicia o cambio de uso do Centro de Día de Cesantes. Trátase dun edificio rematado hai dous e que segue pechado ao público. Piñeiro anunciou que a instalación non se destinará a persoas maiores “porque non existe demanda en Redondela” para un centro destas características, polo que a Xunta opta por destinar este edificio á atención de persoas con discapacidade intelectual. Unha explicación que non convence á cidadanía redondelá, que asegura que hai unha “gran demanda” deste servizo. O municipio, con preto de 30.000 habitantes, conta con “moita poboación anciá e ningún centro público para poder atender as súas necesidades”. Maribel lembra que actualmente só existen en Redondela dous centros privados, e sinala que moitos veciños non poden ser usuarios “porque non poden pagalo”. Entende que a xustificación que ofrece a Xunta “non é certa”, e apunta á existencia doutros “intereses” do goberno galego para cambiar agora a finalidade do centro. José, que é taxista en Redondela, comparte tamén que existe necesidade no municipio dun centro destas características, xa que hai moita poboación maior, e os centros que existen actualmente ademais de ser privados, “só ofrecen o servizo de atención de día”, e non contan con prazas para residentes. A posibilidade apuntada pola Xunta de Galicia que fala dun cambio de uso para o centro, que se destinaría a persoas “con discapacidade intelectual” non convence a algúns veciños. Iago é escéptico co futuro destas instalacións, e augura que “permanecerán pechadas e sen uso por tempo indefinido”. Desde a Asociación de Veciños de Cesantes amosáronse sorprendidos por este anuncio feito no debate parlamentario. Fernando González, vicepresidente do colectivo, critica que o Concello non os tivese informados a través do Consello Parroquial, e esixe “unha explicación” ao goberno local. González entende que a demanda que existe deste servizo é elevada, e que moitas familias de Cesantes “están a esperar a súa apertura para levar aos seus maiores”. Pola súa parte o alcalde, Javier Bas, asegura que o Centro de Día de Cesantes será utilizado para a finalidade que estaba previsto. O rexedor local e a edil de Servizos Sociais, Teresa París, reuníronse cos responsables da Consellería de Benestar e que xa resolveron “o malentendido”. Bas trasladou aos responsables da Xunta a necesidade de acompasar “as prioridades autonómicas coas necesidades da comarca”. Insistiu en que Redondela necesita un Centro de Día para Maiores, e que por iso Xunta e Concello se comprometen a poñer en marcha as instalacións de Cesantes.    

Gran demanda social
Maribel asegure que existe moita demanda xa que actualmente os únicos centros que hai para maiores son privados.
Prazas de residentes
José que é taxista entende que o centro é necesario porque os que hai privados non teñen prazas residenciais.
Un futuro incerto
Algúns como Iago son escépticos sobre o futuro do edificio e augura que permanecerá pechado e sen uso.
Asociación de Veciños de Cesantes
Fernando González explica que a parroquia necesita un centro destas características.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *