Hoxe é Sábado 28 de Novembro de 2020

O C.R. Chapela busca o título de liga en Boiro

RR_Noticias

A Liga Galega de Traiñeiras chega ó seu fin coa Bandeira Concello de Boiro. O Club de Remo de Chapela ocupa a primeira praza do campionato, aínda que o rival directo, Amegrove, está a só dous puntos, polo que todo se decidirá esta fin de semana. En canto ás posibilidades de participar nos play-off para ascender á liga ACT no club son pesimistas, xa que a falta de apoio económico por parte do Concello fai imposible optar á categoría.

A recta final da Liga Galega de Traiñeiras-A está máis emocionante ca nunca. A igualdade entre o os clubs de Chapela e Amegrove ao longo do campionato, e mesmo a melloría de resultados de Meira nestas últimas semanas, fará que todo se decida na última regata. Os días 18 e 19 deste mes participan na XXII Bandeira Concello de Boiro, onde se decidirá o campión de liga. Encabeza a clasificación o club redondelán, pero a tan só dous puntos de distancia dos grovenses. Para o presidente do C.R. Chapela, Fernando Collazo, sería “un soño” facerse co título logo do duro traballo feito polo equipo nos últimos anos. O obxectivo está xa moi preto, pero é consciente de que a vantaxe sobre os seus inmediatos seguidores é mínima, polo que deben facer “unha boa regata”. Con esa idea se desprazan a Boiro, onde agardan que os acompañe o bo tempo “e o mar en calma”, o que beneficiaría ó barco de Chapela, vistos os resultados das regatas anteriores. Outra gran ilusión para o club redondelán, é o feito de poder participar nos play-off de ascenso para a liga ACT, ao que optan os dous primeiros clasificados da liga galega. Con todo Collazo amósase pesimista en canto a esa opción, non pola calidade deportiva do equipo, senón pola falta de apoios económicos. O presidente do club lamenta a negativa do Concello a facer unha achega que lles permita afrontar a participación do C.R. Chapela na elite do remo a nivel estatal. A directiva do club entende que o goberno local “non ten en conta ó remo malia os bos resultados do equipo”, mentres si apoia a outros deportes. Por outra banda están aínda pendentes de recibir as axudas “comprometidas o pasado ano” e que de non facerse efectivas porían nunha situación “crítica” ao C.R. Chapela.  

Fernando Collazo presidente
No club agardan cumprir o soño e facerse co título.
Bandeira Concello de Boiro
Collazo agarda ter o mar en calma nesta última proba do calendario.
Falta de apoio
No club lamentan a falta de apoio por parte do Concello que os limita para participar na liga ACT.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *