Hoxe é Mércores 14 de Abril de 2021

O Arcade segue vivo logo da vitoria no derbi

RR_Noticias

Quedan catro finais ata que remate a liga na Primeira Autonómica, e semella que haberá que agardar ata a última xornada para saber que equipos se salvan do descenso. Os de Jacobo Montes, logo de gañar ó Chapela, dependen de si mesmos para acadar a permanencia, xa que se enfrontan a varios rivais directos. A próxima cita será no campo do Marcón, que se xoga tamén a categoría.

Foron 90 minutos de infarto os que se viviron no derbi entre o Arcade e o Chapela o pasado domingo. Os dous equipos se xogaban moito xa que loitan pola permanencia, sobre todo o Arcade. De ter perdido este encontro os de Jacobo Montes terían dito xa adeus á categoría. Mentres os redondeláns, que perdían por 1-0, seguen con opcións, aínda que teñen por diante unha dura recta final. O encontro foi de “máxima tensión”, dado o transcendental que era o choque para ambas formacións. Os de Soutomaior comezaron dominando e puideron adiantarse no minuto 15, cando o colexiado lles pitou un penalti a favor, pero erraron o lanzamento. Foi un xerro de auga fría para os de Montes, que se viñeron abaixo, pasando a dominar o partido o Chapela. Os de Luis Ferreira tiveron varias opcións pero non houbo acerto. Xa no último cuarto de hora do segundo tempo chegaba o gol do Arcade, que con moitos apuros conseguiu manter a vantaxe ata o final. O adestrador salienta a importancia destes tres puntos, que lles permite “seguir vivos” na competición cando restan catro xornadas. A satisfacción é total no club, xa que agora dependen de si mesmos para salvar a categoría, e haberá varios enfrontamentos directos entres os equipos que se están a xogar a permanencia. A primeira das catro finais será o próximo domingo no campo do Marcón. Jacobo Montes entende que será o partido “máis difícil” dos catro que quedan. O técnico entende que o feito de tratase dun campo de terra “vai prexudicar” ó Arcade. Na seguinte xornada recibirán ó Bouzas B, practicamente descendido, e xogarán logo fóra co Domaio. Rematarán a liga na casa, diante do San Martiño, que tamén se xoga a permanencia, polo que poida que sexa nesa última xornada cando se decida que equipos se salvan do descenso. O Chapela, pola súa banda, terá un encontro tamén moi complicado xa que o domingo recibe ó Alerta Travesas, líder do grupo.  

Jacobo Montes adestrador
O técnico amósase optimista coas opcións do equipo logo da vitoria sobre o Chapela.
Marcón-Arcade
Para Montes será o máis difícil dos catro partidos que lles quedan.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *