Os amantes do teatro e das artes escénicas teñen a posibilidade de achegarse a esta paixón a través dos cursos de teatro que a Concellería de Participación Cidadá organiza nos centros parroquias de Ventosela, San Estevo de Negros, Vilar de Infesta e Chapela para grandes e cativos
Os centros de Ventosela e Negros acollen obradoiros de teatro dirixidos aos máis pequenos, a nenos e nenas de idades comprendidas entre os 4 e os 12 anos. Así, en Ventosela segundo nos explicaba a monitora dos obradoiros, Chusa Couñago, os cativos están xa a traballar nunha montaxe musical estilo cabaret mentres que en Negros prevén comezar a montar o “Mago de Oz”. Os adultos teñen as súas posibilidades no centro parroquial de Vilar e no Multiusos do Piñeiral en Chapela. Un elenco de actores afeccionados que nalgún dos casos xa levan tempo participando destes obradoiros mentres que noutros casos veñen de incorporarse a estes grupos de teatro. Chusa Couñago lembraba que as persoas interesadas aínda teñen a posibilidade de participar achegándose aos centros culturais. A duración dos obradoiros é anual e o custe dos mesmos é de 20 euros, que se abonarán no momento da inscrición.