Hoxe é Domingo 13 de Xuño de 2021

Os equipos locais perden tres puntos esta xornada

RR_Noticias

Tan só o Choco, en Terceira Autonómica, conseguiu sumar un punto ao seu marcador tras empatar a un tanto contra o Casablanca. Os demais equipos perdían fronte aos seus contrincantes.

 
Rexional Preferente
Choco-Porriño (0-3). O Choco non foi quen de superar ao Porriño. Cero tres foi o resultado dun encontro onde os porriñeses dominaron dende o primeiro minuto. En tan só media hora os visitantes sentenciaban o partido co tres goles de Cañi, Mikel e Groba. Os choqueiros non tiveron o seu mellor encontro, con erros que non desaproveitou o conxunto do Porriño. O primeiro dos goles chegaba no minuto 10 despois de que o redondelán Isma sacara un balón coas mans e rematara nos pés de Cañi, que anotaría o cero un a porta baleira. Quince minutos despois chegaría o segundo tanto da man de Mika cun disparo dende o centro do campo.
 Despois do descanso o Choco tentou remontar o marcador pero o Porriño non lles permitiu chegar a súa portería nun estadio de Santa Mariña onde 250 seareiros animaron ao conxunto local malia a chuvia.
Deste xeito o Choco queda na novena posición con dez puntos e a vindeira semana tampouco o terá nada sinxelo, xa que se enfronta a un dos líderes da categoría, o Estradense, situado na cuarta posición con doce puntos.
Primeiro Autonómica
Arcade-Salvaterra (1-2). Mala xornada tamén para os de Arcade que non conseguiron imporse ao Salvaterra. Un encontro que xa sabían difícil pero que esperaban gañar despois de superar a pasada semana ao Valadares. Pero os locais non souberon aproveitar varias das oportunidades que tiveron ao longo do encontro e perdían por 1-2 fronte ao sexto da categoría, o Salvaterra. Unha derrota que deixa aos locais entre os catro últimos da categoría, na décimo sexta posición con tres puntos. A próxima xornada terá unha oportunidade de sumar tres puntos ao seu haber xa que terá que enfrontarse ao penúltimo de Primeira Autonómica, o Caldas que polo momento tan só sumou dous puntos, no que vai de liga.
Segunda Autonómica
Chapela-Nieto (0-3). O Chapela perdía esta semana por 0-3 contra o Nieto. O Nieto demostrou a súa superioridade ao longo de todo o partido e porqué é o cuarto de Segunda Autonómica. Unha goleada que deixa aos de Chapela no noveno posto da clasificación con sete puntos. A vindeira semana tampouco o terá nada sinxelo xa que se medirá cun dos seus rivais directos o Mos, un posto por riba dos redondeláns e empatados a puntos.
Terceira Autonómica
Sampaio-Arcade (2-1). Derrota tamén para os de Arcade en Terceira Autonómica que non puideron gañar ao cuarto da categoría o Sampaio. 2-1 foi o marcador final do partido, que sitúa aos locais na sétima posición, empatado a seis puntos co Soutomaior, Beluso e Moaña. O próximo partido xogarao na casa fronte ao Caroi, o décimo da clasificación e que conta con dous puntos menos que os locais.
Choco-Casablanca (1-1). O Choco non foi quen de sumar unha nova vitoria esta semana que o consolidaría como líder de grupo. O Casablanca foi superior durante os noventa minutos de xogo, malia que tan só conseguiu sumar un punto ao seu marcador. Empate a un gol que deixa aos locais no segundo posto despois do Coia e precisamente con este equipo será co que teña que enfrontarse a vindeira xornada. Un encontro complicado que lle dará a oportunidade aos choqueiros de recuperar o primeiro posto, xa que se atopan empatados a 13 puntos co líder.
Gondar-Cesantes (2-0). O Cesantes perdía esta semana fronte ao Gondar, un dos equipos máis fortes da categoría. Dous foron os goles que lle anotaron Taboada e Ceser, do Gondar ao Cesantes.  Pero a vindeira semana os locais terán a oportunidade de sumar tres puntos ao marcador e saír da oitava posición na que se atopan arestora, xa que o seu rival será o último do grupo 17, o Portonovo, que durante estas primeiras semanas de liga aínda non sumou ningún punto a súa clasificación.
O Soutomaior, despois de gañarlle ao Santomé por 1-3 a pasada xornada, este fin de semana descansou. Un descanso que lle servirá de moito para afrontar o seu vindeiro partido xa que terá que xogar contra o líder da categoría, o Bueu. Os de Soutomaior, trala última vitoria atópase na oitava posición con seis puntos.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *