Foto de arquivo do primeiro derbi da tempada // Estación Balonman Patry Rivas
Primeira Autonómica Masculina
VALINOX NOVAS B – SAR OPMOBILITY (29-35)
SAR OPmobility desprazouse ata O Rosal para enfrontarse ao Valinox Novás B nun partido que non comezou da mellor maneira. Os locais acadaron un rápido 6-2 a favor, o que obrigou ao equipo redondelán a ir a remolque durante toda a primeira parte. A pesar dos esforzos por achegarse no marcador, o Valinox Novás mantivo a vantaxe e chegouse ao descanso cun 20-15.
Na segunda metade, o SAR OPmobility mostrou unha versión completamente diferente. Os xogadores foron recortando distancias gol a gol ata conseguir o empate a 23 no minuto 43. No último cuarto, cun xogo moito máis fluído e un excelente traballo defensivo, lograron darlle a volta ao partido e levarse a vitoria por 29-35.
BALONMAN CHAPELA – CALVO XIRIA B (38-22)
Na mesma categoría, o Balonmán Chapela impuxo a súa lei na casa fronte ao Calvo Xiria B. Os locais dominaron desde o primeiro minuto e chegaron ao descanso con 10 goles de vantaxe (17-7). Na segunda metade continuaron ampliando a renda ata conseguir unha clara vitoria por 38-22. Con este resultado, o Chapela escala ata a cuarta posición da táboa.
Tras o parón de dúas semanas por Semana Santa, a competición retomarase o fin de semana do 12 de abril. SAR OPmobility enfrontarase ao Balonmán Chapela no Pavillón Manuel González Soto nun derbi clave entre dous equipos de Redondela moi igualados: SAR ocupa o terceiro posto con 31 puntos e o Chapela o cuarto con 26.
Segunda Autonómica Masculina
O SAR Globalmar recibiu este domingo na Bombonera ao Asmubal Meaño nun partido sen demasiadas complicacións. Desde os primeiros minutos, o equipo amosou unha gran efectividade ofensiva, con bo xogo co pivote e numerosos contraataques que abriron fenda rapidamente. O 10-2 inicial xa encamiñou o encontro e ao descanso o 24-12 deixaba o choque practicamente decidido.
Na segunda metade mantívose a mesma dinámica, con rotacións, alto ritmo e boas accións en ataque que impediron calquera reacción dos visitantes. O partido concluíu cun contundente 47-25.
Tras o descanso, o SAR Globalmar visitará a pista do Balonmán Pontedeume.
