A parroquia de San Esteban de Negros prepárase para despedir o verán cunha gran festa este sábado, 6 de setembro, organizada pola directiva da Asociación de Veciños, co apoio do Concello de Redondela e a Deputación de Pontevedra. O evento, que promete un ambiente festivo para todas as idades, comezará ás 17:00 horas e prolongarase ata a noite.
A xornada arrancará cun inchable para os máis pequenos, proporcionado pola empresa Skandal, garantindo diversión para os nenos que se preparan para o regreso ao curso escolar. Ás 20:00 horas, terá lugar unha colorida festa de polvos Holi, cun límite de 60 bolsas de po de cores que se distribuirán entre os asistentes. Ademais, os participantes poderán gozar de comida variada, con venda de choripán, perritos quentes e churrasco, este último dispoñible baixo reserva previa na cantina do centro cultural por 10 euros por persoa. Tamén haberá viño, auga, refrescos e unha salsa especial para o churrasco, elaborada por unha veciña da asociación.
José Antonio, membro da directiva da Asociación de Veciños, explicou: “Esta é a segunda edición da nosa festa de despedida do verán, pensada especialmente para os nenos, que volven ao colexio, con inchables e unha divertida festa Holi con polvos de cores. Pola noite, teremos música, karaoke e momentos de humor entre os veciños para animar aos maiores. É unha festa aberta a todo o mundo, coas portas sempre abertas para quen queira sumarse. Recomendamos que, para o churrasco, as persoas interesadas reserven con antelación para calcular a cantidade de comida necesaria”.
Avance da Festa da Mazá de outubro
José Antonio tamén adiantou detalles sobre a próxima edición da famosa Festa da Mazá, que se celebrará en outubro: “Xa estamos organizando todo. O cartel está listo, e estamos en conversas cos nosos colaboradores, que son unha peza clave para o evento. Antes de facer público o cartel, eles serán os primeiros en coñecelo, xunto cos nomes dos pregoeiros. O ano pasado foi un éxito rotundo, vendemos 300 quilos de mazás e utilizamos 4.000 quilos para elaborar produtos como sidra doce, sidra añeja, mazá con bacallau, chourizo á sidra, tortas e empanadas de mazá. Este ano tamén teremos unha sorpresa especial, e todos os pratos serán elaborados con moito cariño”.
A Asociación de Veciños invita a toda a cidadanía a participar nesta festa que combina diversión, gastronomía e comunidade, consolidando a San Esteban de Negros como un lugar de referencia para celebracións cheas de tradición e bo ambiente.
