A Policía Local de Redondela interveu na madrugada do luns ao martes en varios incendios rexistrados en colectores de lixo situados nas zonas de Reboreda-Quintela e Ventosela, uns feitos que apuntan a unha acción intencionada.
Segundo informou o corpo policial, os axentes conseguiron sufocar, coa colaboración de varios veciños, ata tres incendios en colectores antes da chegada dos servizos de emerxencia. Nun dos casos, os autores introduciron un dos colectores no interior dunha marquesiña de autobús e posteriormente prendéronlle lume, o que incrementou o risco de danos materiais.
Ata o lugar desprazouse tamén o GES de Mos, que completou as tarefas de extinción dos incendios.
Mentres actuaban en Redondela, o GES de Mos recibiu un novo aviso por varios colectores ardendo na parroquia de Nespereira. A coincidencia temporal destes sucesos leva a considerar que poderían responder a unha mesma acción vandálica.
Desde a Policía Local condenan este tipo de actos, que supoñen un perigo para a seguridade das persoas e poden provocar importantes danos no mobiliario urbano e nas infraestruturas próximas.
