O programa de Roteiros Ambientais e Culturais do Concello de Redondela déixanos tres actividades previstas para os días 21 e 23 de agosto entre as que se inclúen unha saída en kaiak, unha observación nocturna da ría de Vigo e unha ruta ambiental polas parroquias de Saxamonde e Vilar de Infesta.
A programación arrancará o venres 21 de agosto pola mañá, ás 11:00 horas, cunha saída de kaiak turístico á Portela. A actividade prolongarase ata as 12:30 horas e ten un prezo de 20 euros por persoa. A proposta permite achegarse ao litoral de Redondela desde unha perspectiva deportiva e respectuosa coa contorna.
Xa pola tarde-noite, ás 20:00 horas, terá lugar o paseo “Observación Xeográfica, Histórica e Natural da Ría de Vigo”, no miradoiro do Outeiro Grande, no Viso. A actividade, prevista ata as 22:30 horas, será gratuíta e permitirá coñecer o territorio e a paisaxe da ría nunha experiencia nocturna. O Outeiro Grande forma parte das localizacións que o Concello incorpora á súa programación ambiental para divulgar os valores naturais e paisaxísticos do municipio.
A axenda continuará o domingo 23 de agosto, entre as 10:00 e as 13:00 horas, coa ruta ambiental “Terras de Saxamonde e Vilar de Infesta”. O percorrido, tamén gratuíto e con guía, busca achegar participantes ao patrimonio natural destas dúas parroquias.
As tres propostas forman parte dun programa municipal que este agosto reúne 16 actividades ambientais e culturais, con roteiros, visitas guiadas e actividades deportivas destinadas a diferentes públicos. O Concello salienta o carácter sostible das iniciativas, orientadas a descubrir a biodiversidade e o patrimonio de Redondela sen deixar pegada na contorna.
Prazas limitadas e inscrición previa
Para participar é necesario realizar reserva previa, xa que as prazas son limitadas. As inscricións poden formalizarse na Oficina Municipal de Turismo de Redondela, situada na rúa Isidoro Queimaliños, ou a través do teléfono 986 401 713 e do correo electrónico turismo@redondela.gal.
