Case un mes despois da desaparición de María Pereira, a súa familia e amizades volverán mobilizarse este sábado nunha nova gran batida para tratar de localizar á muller, de 75 anos e enferma de alzhéimer. A cita será ás 9.00 horas, con saída desde a área recreativa de Quintela. Punto de encontro: https://maps.app.goo.gl/jnxsm7jTyqqnZEkX8?g_st=aw
María Pereira permanece desaparecida desde o pasado 29 de xuño, cando se lle perdeu o rastro entre as parroquias de Saxamonde e Santo Estevo de Negros. Desde entón sucedéronse os operativos de busca, nos que participan tanto os equipos de emerxencias como numerosos voluntarios.
Ao longo desta semana, familiares e colaboradores percorreron de forma exhaustiva o rego das Maceiras, revisando as súas marxes e a maleza coa esperanza de atopar algún indicio que permitise esclarecer o paradoiro da muller. A busca continuará este sábado, ampliando de novo a zona de rastrexo con apoio da veciñanza.
Os organizadores fan un chamamento á participación cidadá para reforzar o dispositivo. «Cantos máis sexamos, máis territorio poderemos cubrir e máis posibilidades haberá de atopar calquera indicio que permita dar co paradoiro de María ou avanzar na investigación», sinalan.
Tras case un mes de procura ininterrompida, o cansazo é evidente entre a familia e os voluntarios. Con todo, insisten en non abandonar a busca e apelan tamén á colaboración das persoas que residen na contorna para que revisen con detalle leiras, galpóns, alpendres ou calquera outro espazo onde María puidese refuxiarse. «Calquera pista, por pequena que pareza, pode ser decisiva», lembran.
