Foto de MAChremo
O Club Remo Chapela-Wofco, organizador e anfitrión, celebrou o pasado domingo o XX Memorial “Paco Fenosa” en honra a Francisco Alonso Loureiro, primeiro presidente do club e figura emblemática do remo galego. A proba, consolidada como “unha festa do remo” para a parroquia, reuniu embarcacións de toda Galicia nas categorías masculina, feminina, base e veteranos, ofrecendo unha xornada de competición e convivencia.
Tras unha xornada de competición os resultados foron un éxito para os locais. Na proba feminina, as mozas de Chapela-Wofco proclamáronse soberanas campioas cun tempo de 22:58:08, superando a Tirán-Pereira (23:34:33) e Cabo de Cruz (24:52:02) nun duelo emocionante que deixou a primeira bandeira de honra para as locais. Na categoría masculina, os anfitrións exhibiron unha superioridade contundente, acadando a vitoria con 19:41:23, seguidos por Tirán-Pereira (19:58:47) e Cabo de Cruz (19:59:10), sendo os únicos en baixar dos vinte minutos, con Ares (20:04:74) en cuarto lugar.
Nas probas de veteranos, Samertolaméu dominou na categoría masculina con 15:04:85, por diante de Chapela-Wofco (15:07:67) e Vila de Cangas (15:24:17). Entre as veteranas, Remo Puebla logrou o triunfo con 18:49:35, seguida por Mera (19:09:40) e Chapela-Wofco mixto (19:10:77), con Vila de Cangas (20:06:73) en cuarto posto. Desta forma, entregáronse dúas bandeiras ás tripulacións sénior con mellores tempos, unha por categoría, que este ano quedaron en mans de Chapela-Wofco.
O evento, que marcou o inicio da tempada na categoría raíña, reuniu a deportistas de diferentes clubs galegos para “medir forzas” nun ambiente de festa e deporte. Con esta dobre vitoria sénior, Chapela-Wofco non só defendeu o seu terreo, senón que consolidou o seu liderado, deixando atrás o reinado de Cabo de Cruz do ano pasado.
