Hoxe é Martes 7 de Decembro de 2021
Stations
NOTHING FOUND!
Current listeners: 
Peak listeners: 

Redondela renova o convenio de transporte metropolitano con 27.000 euros de custe anual

transporte tarxeta

O pleno municipal vén de aprobar, cos votos en contra de AER e o apoio dos concelleiros de PSOE, PP e BNG, a adhesión do concello de Redondela ao novo convenio da Xunta para o transporte metropolitano da área de Vigo. Un convenio que quere dar continuidade ao xa asinado no ano 2015 e que supón un aforro económico para os veciños e veciñas dos concellos adheridos así como a promoción do transporte público entre a cidadanía en detrimento do uso do vehículo privado.

Unha sesión extraordinaria que se celebraba ás 14:00 horas de hoxe no Multiúsos da Xunqueira e na que se debatía a adhesión de Redondela a un convenio da Xunta que afecta a un total de 12 concellos de toda a área metropolitana de Vigo e da área do Morrazo (Baiona, Cangas, Moaña, Fornelos, Mos, Nigrán, O Porriño, Pazos, Redondela, Salceda, Salvaterra e Soutomaior).

Todos os grupos amosaron o seu apoio ao mesmo agás os edís de AER, quen votaron en contra alegando que “se trata dun servizo que é competencia da Xunta de Galicia, polo que debería ser asumido o seu custe polo goberno galego”. Entenden ademais que non pode falarse dun transporte metropolitano cando non se inclúe o servizo de tren de proximidade.

Daniel Boullosa, AER

Malia compartir esa apreciación, dende o BNG entenden que esta colaboración serve para mellorar os intereses da veciñanza e insistían na necesidade de acometer medidas que favorezan o uso do transporte público, como por exemplo reducindo o custe que aos usuarios lles supón usar estes medios para se desprazaren. Criticaba neste sentido o edil nacionalista Xoán Carlos González, que non se adopten dende a Xunta outras liñas de comunicación que favorecerían o desprazamento dos veciños “por exemplo dos traballadores que se despraza a Porriño”.

Xoán Carlos González, BNG

O PP poñía sobre a mesa que o número de beneficiarios da tarxeta metropolitana ascende a 5.787 persoas e que son preto de 1.500 mozos e mozas os que contan con transporte gratuíro polas bonificacións da Xunta. Criticaba Carmen Amoedo que o convenio “se traia ao pleno este convenio no día no que remata o prazo para poder adherirse” e falaba de “desgoberno” por parte do PSOE.

Carmen Amoedo, PP

Replicaba a edil socialista María Castro lembrando que outros concellos da  bisbarra gobernados polo PP, como Mos ou Soutomaior, tamén o someterán a pleno hoxe mesmo “porque a Xunta o remitiu aos concellos o 30 de setembro, sen practicamente tempo para que fora analizado polos técnicos municipais”. Concluía afirmando que se vai “colaborar para seguir favorecendo e promovendo un servizo de transporte colectivo moi necesario para Redondela e que, malia compartir que “debería ser a Xunta quen puxera os cartos, iso non vai ser impedimento para que asinemos un convenio que beneficia aos veciños”.

María Castro, PSOE

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *