Hoxe é Venres 14 de Maio de 2021

Veciños de Chapela esixen o arranxo urxente de camiños que están “intransitables”

CHAPELA

A Asociación de Veciños de Chapela denuncia o grave estado de deterioro de varios camiños da parroquia. Ángela Méndez, voceira do colectivo, sinala que viais como o Camiño das Ánimas, do Subido e Penisal supoñen “un verdadeiro perigo para peóns e conductores”. Lembra que estes viais foron arranxados hai máis de dous anos, pero o resultado “non foi o esperado”. O firme era “totalmente esvaradío”, o que sumado á pendente destes camiños provocaba “continuos accidentes” tanto con caídas de peóns como colisións de vehículos. Méndez explica que “como solución de urxencia” o Concello realizou unhas obras que consistiron en fresar o firme “cunha serie de regos” para gañar adherencia. Os veciños entenden que esta medida debería ser algo “provisional” antes de facer un novo asfaltado “en condicións”. Máis dun ano despois, a situación lonxe de mellorar “empeorou”, xa que o fresado do asfalto co paso de tempo “formou grandes fochancas e buracos que supoñen un grave perido para viandantes, coches, bicicletas o motos”.

Ángela Méndez, da Asociación de Veciños de Chapela

No Camiño da Formiga, onde non se realizou o rozado do asfalto, o firme segue a ser moi esvaradío e provoca problemas para peóns e vehículos. Desde o colectivo veciñal afirman que xa esperaron tempo “máis que suficiente” e advirten que a pacidencia “esgótase”.

Reposición dos camiños afectados pola AP-9

O Camiño de Pasán é outro dos viais da parroquia en mal estado. As obras de ampliación da AP9 provocaron danos que deixaron este camiño en malas condicións. A día de hoxe está practicamente sen asfalto, con numerosas fochancas, e os días de chuvia “é unha lameira”, sinala Méndez. Os veciños lamentan que se permitira a inauguración da autoestrada hai dous anos “sen repoñer os servizos afectados e sen cumprir coas melloras comprometidas na parroquia”.

O Camiño de Pasán é un dos afectados polas obras de ampliación da AP9.

A reparación do Camiño de Pasán está incluída dentro da adenda que, malia estar aprobada desde hai máis dun ano, aínda non se executou.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *