Hoxe é Martes 3 de Agosto de 2021

Os alcaldes da comarca piden un cumprimento “estrito” das medidas para frear a pandemia

ALCALDES

A terceira onda da Covid está desbocada na comarca de Redondela, ao igual que no resto de Galicia e no conxunto do Estado. As duras medidas de restricción decretadas pola Xunta, e que entran mañá en vigor en toda a comunidade, tentar frear a curva ascendente de contaxios. Establécese o peche perimetral en todos os Concellos galegos, só se permiten reunións de conviventes, o comercio non esencial debe pechar ás 18.00 horas, peche total da hostalaría (só pode ofrecer comida para levar), e peche tamén de centros culturais e sociais, bibliotecas, museos, etc.

Na comarca os contaxios de Covid-19 incrementáronse moito nos últimos días, coas peores cifras desde que comezou a pandemia. En Redondela hoxe os datos do Sergas apuntan 177 casos activos, son 60 máis que hai unha semana, cunha incidencia acumulada de máis de 560 casos por cada 100.000 habitantes. A alcaldesa, Digna Rivas, fai un chamamento á veciñanza “para que cumpra escrupulosamente con todas as normas”, para tentar atallar a curva ascendente de contaxios xa que depende “da responsabilidade individual de cada un”.

Digna Rivas, alcaldesa de Redondela

Desde o Concello de Redondela suspéndense as actividades culturais e pechan os multiúsos de Chapela e Redondela, pavillóns e pistas deportivas, e tamén os parques infantís “para evitar a reunión de persoas non conviventes”.

Redondela pecha os multiúsos, instalacións deportivas e parques

No municipio veciño de Soutomaior tamén se incrementaron notablemente os casos, cun total de 69 persoas contaxiadas, son 45 máis que as que se rexistraban hai unha semana, e a incidencia acumulada dispárase aos 900 casos por cada 100.000 habitantes. Unha situación que preocupa moito ao alcalde, Agustín Reguera, quen asegura que desde o Concello xa teñen feito “todo o que está na súa man” para atallar a onda de contaxios. Antes das restriccións anunciadas pola Xunta de Galicia o goberno local xa decidira suspender a feira de Arcade, e tamén o peche de parques infantís. Lamenta o rexedor que, polo de agora, estas medidas non estean a dar resultado “o resultado desexado” e confía en que as restricións das próximas tres semanas sirvan para frear o virus. Por iso pide “responsabilidade” aos veciños e “que queden na casa”.

Agustín Reguera, alcalde de Soutomaior

No caso de Pazos de Borbén o gromo nunha residencia dispara os datos do municipio. Dos 31 contaxios que rexistra o Concello, a maioría están localizados no fogar de anciáns Mi Casa, con 22 casos entre residentes e traballadores. O alcalde, Andrés Iglesias, pide “moita prudencia” á veciñanza e que todos “cupran de maneira estrita as normas” xa que será a única maneira “de vencer ao virus”

Andrés Iglesias, alcalde de Pazos de Borbén

O empeoramento dos datos, aínda que máis leve, tamén se rexistra en Fornelos de Montes, un municipio que ata hai pouco estaba libre do virus e que agora rexistra 5 infectados.

As medidas de restricción anunciadas pola Xunta, que son efectivas a partir desta media noite, estarán en vigor durante tres semanas, ata o 16 de febreiro.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *