Hoxe é Venres 27 de Novembro de 2020

Alberto Álvarez Pérez, novo concelleiro de Persoal, Limpeza viaria e Parques e Xardíns

RR_Noticias

Este veciño de Rande, Cedeira, é o novo concelleiro do grupo de goberno do Concello de Redondela, logo de tomar onte posesión da súa acta no pleno celebrado no Multiúsos da Xunqueira. Sustitúe no grupo socialista a Leonardo Cabaleiro, que presentou a súa dimisión o pasado mes de xullo.

Álvarez, que xa fora concelleiro do grupo municipal socialista dende marzo de 2019 ata as pasadas eleccións, ocupando a vacante que deixaba Mauro Álvarez Castro. Agora, no grupo de goberno, asumirá as competencias de Persoal, Limpeza viaria e Parques e Xardíns. Veciño de Rande, é técnico especialista en automoción, sector no que desenvolve a súa vida laboral. A alcaldesa, Digna Rivas, ao igual que o resto de compañeiros, defíneo como unha persoa “traballadora, responsable e comprometida coa labor de mellorar a calidade de vida dos seus veciños”.
Sesión bronca malia a aprobación por unanimidade de todos os expedientes
A sesión plenaria celebrada onte comezou cun minuto de silencio en homenaxe ás vitimas da Covid-19 e da violencia de xénero. Todos os expedientes que o equipo de goberno levaba na orde do día para a súa votación foron aprobados por unanimidade. Con todo, iso non evitou a bronca e o cruzamento de acusacións entre o goberno local e o PP. Entre outras cuestións sairon adiante as subvencións para diferentes clubes deportivos e asociacións como Damán, Andaina, Cáritas, Lenda ou Afaga. Todos os partidos políticos estiveron de acordo en recoñecer “a gran labor destes colectivos”, se ben o BNG lamentou que “a falta de orzamento para este 2020 obrigue a levar estas subvecións ao pleno”. O voceiro Xoán Carlos González demandou tamén do goberno local “un regulamento” para tramitar estas axudas con transparencia, ao que a concelleira de AER sinalou que “xa hai un borrador no que se está traballando”. Os populares acusáronos de “chegar tarde” coas axudas, crítica que rexeitou a voceira socialista María Castro, comprometéndose a que as asociacións cobren “canto antes”, ao tempo que lamentou que o Concello tivese que asumir competencias da Xunta de Galicia “no difícil contexto da pandemia”. Tamén se aprobou por unanimidade o Plan Económico Financeiro elaborado polos técnicos municipais. Castro explico que, como o Concello “non cumpriu coa regra de gasto que establece a Lei de Estabilidade Orzamentaria” foi necesario elaborar este plan. Os técnicos municipais sinalan que “non hai un problema estructural”, xa que o Concello conta cun superávit de 3 millóns de euros. Recoñece que se gastaron no ano 2019 uns 450.000 euros máis que en 2018, polo que o Concello debe comprometerse a correxir o desaxuste e limitar o gasto nos anos 2020 e 2021. Os socios de goberno, PSOE e AER, culparon do desfase no gasto ao anterior goberno do PP, que gobernou ata xuño de 2019. O bipartito acusounos de facer electoralismo cos cartos Concello e de ter gastado nos primeiros seis meses do ano “sobre un 80% do total das partidas anuais”. A voceira popular, Carmen Amoedo, rexeitou as críticas e acusou ao bipartito de ser “responsable” dunhas contas “que non cadran”.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *