Hoxe é Martes 1 de Decembro de 2020

Rogelio Carballo: “Os responsables de Educación non pensaron nunca na conciliación familiar”

RR_Noticias

O presidente FANPA, A Federación de Anpas de centros públicos de Pontevedra, advirte que “o tempo esgótase” para concretar o protocolo Anticovid nos colexios. A falta de 15 días para que os alumnos de Infantil e Primaria volvan ás aulas, non hai certeza no arranque do curso para as familias, con servizos como os comedores e aulas matinais cancelados por parte das Anpas. O Multiúsos da Xunqueira acolle esta tarde unha charla informativa dirixida ás directivas das Anpas e ás familias en xeral. Está dirixida ás directivas das ANPAS e tamén a todas as familias que desexen participar. Será ás 19.00 horas, con aforo limitado.

O obxectivo desta charla, explica Carballo, é informar ás familias de como lles afecta o protocolo establecido pola Consellería de Educación por mor da Covid-19. Poderán resolver dúbidas en canto a situacións que se poidan xerar polo contaxio dalgún alumnos, o peche de aulas e a posterior reincorporación á escola de xeito gradual, tal como etablece a normativa vixente. O inicio do curso está marcado pola “incerteza” para as familias, e tamén pola falta de servizos. En Redondela os comedores escolares, aulas matinais e outras actividades xestionadas polas Anpas non se van realizar este curso “mentres a Xunta non modifique os seus protocolos antocovid”. As familias temen os problemas de conciliación que podería carrexar esta medida e claman por medidas máis concretas para garantir unha docencia “segura e de calidade” en plena pandemia. Rogelio Carballo explica que as medidas e protocolos propostos pola Xunta “non garanten o distanciamento adecuado entre os usuarios dos comedores”. Por agora seguen sen noticias da Consellería de Educación, e a súa decisión de non reabrir os comedores mantense firme. Lamentan que desde as administracións, tanto estatal como autonómica, non se tivese en conta a conciliación das familias “nin durante o estado de Alarma nin agora”. O feito de que os rapaces estiveran meses na casa, desde o 13 de marzo “solventouse con reducións da xornada laboral dos pais, EREs ou ERTEs”. Advirte que se os alumnos non poden acudir ás clases presenciais con normalidade o próximo curso “moitos pais e nais arríscanse a perder o seu posto de traballo”. Denuncian a falta de previsión por parte dos responsables de ensino, e agardan desde as Anpas posibles cambios no protocolo “a tan só uns poucos días de que empece o curso”. Mañá xoves, día 27, celébrase unha Conferencia Sectorial de Educación na que participan responsables autonómicos e estatais e que, nesta ocasión, será conxunta con Sanidade. As Comunidades Autónomas reclaman un protocolo para a volta ás aulas unificado para todo o Estado, polo que a normativa galega, publicada no mes de xullo, podería sufrir cambios.
 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *