Hoxe é Venres 30 de Outubro de 2020

Unha queima descontrolada en Quintela mobiliza aos servizos de emerxencias

RR_Noticias

O lume produciuse nunha finca a tan só 50 metros dunha vivenda na madrugada do domingo. Xa foi identificado o responsable, un veciño que realizou unha tala e posterior queima que non tería quedado ben apagada e que se reactivou durante a noite. Dende a Policía Local lembran que estamos en período de alto risco de incendio e que dende o pasado 1 de xullo están completamente prohibidas as queimas agrícolas e forestais.

O suceso producíase na madrugada do domingo cando o 112 alertaba á Policía Local dun lume nas inmediacións de varias vivendas en Quintela. Ata o lugar desprazáronse varias patrullas da Policía Local e Nacional así como os servizos de extinción da Xunta e os bombeiros do Porriño, que procederon a sufocar o lume.
O responsable do incendio tería sido identificado tras comprobarse que na finca onde se iniciou o lume se realizara unha corta de árbores durante a tarde.
Todo quedou nun susto, pero as consecuencias poderían ter sido fatais ao estarmos en período de alto risco de incendios, polas altas temperaturas, o vento, a seca e a gran cantidade de vexetación acumulada nos montes. De feito as queimas están prohibidas dende o pasado 1 de xullo. Dende a Policía piden que se extremen as precaucións e que ante calquera incidencia ou sospeita se poñan en contacto cos números 986402610, 091, 112 ou ben 085.
 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *