Hoxe é Mércores 2 de Decembro de 2020

Redondela manterá en todo o municipio as franxas horarias establecidas no estado de alarma

RR_Noticias

O goberno local non aplicará a “liberdade horaria” ata non dispoñer dos datos reais solicitados sobre a evolución da COVID-19. A alcaldesa, Digna Rivas, e a segunda tenente de alcalde, Susana Couñago, explican que esta decisión ten como obxecto primar “a seguridade e a saúde dos veciños” e que foi adoptada “por precaución e responsabilidade”.

A partir do próximo luns, 11 de maio, coa entrada en vigor da Fase 1 da desescalada, as parroquias de menos de 5.000 habitantes poden suprimir as franxas horarias para as saídas a pasear e facer deporte. Algo que non acontecerá no municipio de Redondela, onde poderían acollerse a esta “liberdade horaria” todas as parroquias agás Chapela e Redondela. O executivo local considera que “ninguén, cun mínimo de responsabilidade, pode adoptar unha medida deste calibre, sen posuír datos fiables da evolución da enfermidade no municipio, datos que a Xunta de Galicia nega reiteradamente a este Concello”. A rexedora explica que a liberdade horaria para toda a poboación podería supoñer un perigo de contaxio “sobre todo para as persoas maiores, que son os máis vulnerables”. A tenente de alcalde, Susana Couñago, lamenta tamén que a decisión de eliminar as franxas horarias recaia nos Concellos “cando non teñen ningún dato sobre o avance da pandemia”. Por iso entende que neste momento “por precaución e responsabilidade” non poden permitilo. Polo tanto, seguirán vixentes as franxas horarias establecidas no Decreto do estado de alarma en todo o municipio. A decisión do goberno local vén motivada tamén por outros factores como o feito de que a Secretaría do Concello “non garante a seguridade xurídica da medida” e que as notificacións da Policía Local chaman a atención sobre que o comportamento da veciñanza “non está sendo todo o bo que debería ser para avanzar na desescalada”. En todo caso, Rivas e Couñago adiantaron a súa vontade “de debater sobre a posibilidade de apertura de horarios nas parroquias”, pero dita decisión aprázase ata o mércores, día 13, cando se celebrará unha xuntanza da Comisión de Seguemento” para acadar unha maior seguridade xurídica e consultar aos grupos da oposición”. En tanto non se celebre dita comisión, en todo o termo municipal redondelán seguirán vixentes as franxas horarias establecidas no estado de alarma e a Policía Local manterá o seu traballo de vixilancia no cumprimento das mesmas. Responsabilidade da cidadanía Piden tamén “responsabilidade” aos veciños para que non “relaxen” as medidas de seguridade e precaución para evitar os contaxios, sobre todo “a distancia social”. Advirten que despois de case dous meses de sacrificio e confinamento “non podemos permitirnos unha volta atrás nesta crise sanitaria”. Lembren que se manteñen as saídas para facer deporte e pasear entre as 06.00 e as 10.00 horas ou de 20.00 a 23 horas; para os maiores e dependentes de 10.00 a 12.00 horas e de 19.00 a 20.00 horas; para nenos de 12.00 a 19.00 horas.  

Alcaldesa Digna Rivas
A prioridade é a saúde dos veciños e veciñas
Tenete de alcalde Susana Couñago
Déixase a decisión en mans dos concellos sen dispor de datos sobre contaxiados

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *