Hoxe é Venres 30 de Outubro de 2020

AER propón aos grupos políticos ceder 90.000 euros da súa asignación para axudas pola Covid-19

RR_Noticias

A crise sanitaria, económica e social por mor da pandemia do coronavirus chega hoxe ao pleno que celebra a corporación de Redondela. A sesión telemática inclúe unha proposta da Agrupación de Electores para que os grupos políticos renuncien a parte das asignacións que reciben, e que eses cartos se dediquen “a paliar os efectos da crise económica e social provocada pola pandemia na veciñanza redondelá”.

Na sesión plenaria que comezará hoxe ás 20.00 de xeito telemático, AER defenderá que se recupere a proposta de retribucións do goberno bipartito, e derrogar a aprobada por PP e BNG en setembro do ano pasado, que incrementa en 90.000 o gasto no conxunto do mandato. A Agrupación de Electores considera que “esta é a mellor maneira de amosar o verdadeiro compromiso dos grupos políticos municipais coa sociedade, máis alá de achegas simbólicas”. Explican que desde o Concello de Redondela será necesario levar a cabo diferentes tipos de medidas “especialmente no ámbito social e económico” que implicará “ben un aumento do gasto, ben un descenso de ingresos”. Por iso a agrupación entende que hai que buscar “medidas de aforro”. Fronte a iniciativas doutras forzas políticas, AER defende que “a mellor maneira que teñen os grupos políticos deseren útiles é rebaixar as asignacións económicas que perciben dos orzamentos municipais”. A Agrupación de Electores de Redondela leva ao pleno deste xoves que a asignación aos grupos políticos sexa de 2.700 euros brutos anuais para o grupo político, máis 300 euros brutos anuais por cada concelleiro.A proposta substituiría á que actualmente está en vigor, e que supón un aforro de 22.500 euros ao ano, cun total de 90.000 euros no mandato de catro anos.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *