Hoxe é Martes 27 de Outubro de 2020

Redondela pon en marcha un servizo de consultas sobre o COVID-19 para Pemes e autónomos

RR_Noticias

O servizo estará dispoñible a partir do próximo luns, 11 de maio, a través do teléfono, correo electrónico e cun formulario web accesible na páxina web do Concello redondelán. Trátase de ofrecer información específica para o sector produtivo “de cara a resolver as dúbidas que se lle poidan presentar e a darlles conta das líñas de axuda habilitadas polas distintas administracións”.

A partir do próximo luns, 11 de maio, Pemes, autónomos e persoas traballadoras de Redondela poderán contar cun servizo de atención personalizada, apoiado por expertos nos distintos ámbitos temáticos, no que se resolverán as dúbidas que se lle poidan presentar e se lles informará das axudas de carácter fiscal, laboral e económico postas en marcha pola emerxencia sanitaria da COVID-19. Trátase, segundo a alcaldesa Digna Rivas, de poñer ao alcance do sector produtivo do municipio “todas as ferramentas precisas que lle axuden, á maior brevidade posible, a unha volta á normalidade”. A páxina web do Concello de Redondela conta cunha sección específica COVID-19, na que se recollerá información para Pemes, autónomos e autónomas e persoas traballadoras. Para unha maior funcionalidade, a páxina conta cun apartado de “Consultas frecuentes” na que se irán rexistrando as preguntas recibidas polo servizo de asesoramento e as respostas que poidan ser de interese para outras empresas ou persoas con problemáticas similares. A web do Concello xa conta desde o inicio da pandemia cun apartado específico sobre o COVID-19 no que se detallan as medidas postas en marcha, tanto polo Goberno central como pola Xunta de Galicia, Deputación de Pontevedra e Concello. Esta sección “amplíase agora con este servizo específico para o sector produtivo” de cara a resolver as dúbidas que se lle poidan presentar e a darlles conta das líneas de axuda habilitadas polas distintas administracións”. A alcaldesa subliñou que tanto esta sección web COVID-19 coma o servizo de consulta específico para Pemes, autónomos e traballadores, forman parte “dun amplo plan de reactivación local no que traballa o goberno local e que incluirá un amplo abano de medidas de contención dos efectos que a crise sanitaria está a provocar no municipio”. Rivas explicou que o Concello elabora un “Plan de choque”, para o que se contará coa participación da Asociación de Empresarios e persoas autónomas do municipio no que se inclúan unha serie de medidas concretas que axuden a contrarrestar o choque que, para a nosa economía local, supón esta crise tanto económica como sanitaria.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *