Hoxe é Xoves 29 de Outubro de 2020

Normalízase o abastecemento de material de protección nas farmacias

RR_Noticias

Nin listas de espera, nin desabastecemento de máscaras, nin xeles hidroalcohólicos, nin de luvas nas farmacias do noso municipio. Atopar estes produtos xa non é unha odisea e na actualidade tan só hai algunha demora no caso das máscaras infantís dada a alta demanda dende o pasado domingo. Nas próximas semanas tamén continuará a distribución gratuíta de máscaras para persoas vulnerables do concello a través destes establecementos.

Aínda que no inicio da pandemia si houbo problemas para atopar este material nas farmacias de Redondela, arestora a distribución normalizouse e xa non é preciso reservar os produtos xa que tanto as máscaras, como os xeles desinfectantes e as luvas pódense adquirir en calquera das boticas do municipio. Iso si, segundo nos explica a farmacéutica Rita Pereira, no caso das luvas tan só se vende un par e non caixas e no caso das máscaras infantís si que existe lista de espera debido ao inicio das saídas dos menores de 14 catorce anos o que provocou un incremento da demanda na última semana. A titular da farmacia redondelá, recoñece que ao comezo da pandemia a situación foi complicada e conseguir material de protección no mercado, difícil. Considera que o feito de non terse fixado dende o inicio un prezo por parte do Goberno para este tipo de produtos e que non se rebaixase o IVE manténdoo ao 21%, dificultou máis o proceso de adquisición e fixo que as empresas provedoras deste material de protección básico neste momento, se aproveitasen. Uns establecementos a través dos cales o Concello tamén está a distribuír máscaras de balde á poboación prioritaria. As primeiras entregas xa se fixeron entre as persoas máis vulnerable por cuestións de saúde ou de idade. Polo momento este material está esgotado nas farmacias, á espera de que o Concello dispoña de novas mascaras, pero si existe unha lista de espera na que poder apuntarse. A próxima semana o Colexio de Farmacéuticos tamén asinará un convenio coa Xunta polo cal se distribuirán máscaras gratuítas ás persoas con menor renda, aqueles con aportación cero ou do 10%, aos que se lle cargará na súa tarxeta sanitaria entre dúas e tres máscaras.    

Farmacéutica Rita Pereira
É posible adquirir calquera tipo de material de protección salvo as máscaras infantís para as que hai lista de espera
Problemas para atopar material
Fixar un prezo ao inicio da pandemia e rebaixar o IVE solucionaría parte do problema de desabastecemento inicial
Máscaras Concello
O concello distribúe a través das farmacias máscaras de balde á poboación prioritaria

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *