A Avenida de Vigo en Chapela foi o lugar no que se producía un aparatoso accidente de tráfico na tarde do pasado sábado. O sinistro tiña lugar cando o condutor dunha furgoneta, por causas que está a investigar a Policía local, perdía o control e colidía contra dous vehículos estacionados, quedando envorcado no medio da estrada. Os ocupantes da furgoneta déronse a fuga, supostamente para evitar seren sometidos a un control de alcohol e drogas, sendo localizados posteriormente, tramitándose a correspondente denuncia ante o xulgado.
O suceso tiña lugar ás 16:30 horas do sábado e, malia o aparatoso do accidente e seren tres os vehículos implicados, afortunadamente non hai que lamentar feridos, aínda que si importantes danos materiais.
A furgoneta que provocou o accidente saíuse da vía colidindo primeiramente contra un turismo estacionado nun lateral da Avenida de Vigo, á altura da antiga estación de Chapela e rebotando ata chocar tamén contra outro turismo aparcado no lateral oposto da estrada.
Unha vez no lugar, os axentes da policía local comprobaron que os dous ocupantes da furgoneta déranse á fuga, sendo localizados horas despois, tramitándose a correspondente denuncia.
