A praza do Concello acolleu esta tarde a homenaxe aos veciños e veciñas que ao longo dos anos participaron activamente nestas festas, así como o acto solemne de relevo das penlas. O pregón, a cargo do antigo Grupo Folclórico de Redondela, lembrou os éxitos desta agrupación, e a Orquestra París de Noia pechará os actos de hoxe co concerto no campo da feira.
Marisa González, Marivina Reboredo e Aurora Bastos, foron as encargadas de ler o pregón destas Festas da Coca, en representación do antigo Grupo Folclórico de Redondela. Esta agrupación, en activo entre 1969 e 1976, levou o nome de Redondela por toda Galicia, e tamén polo resto de España e Portugal, chegando a actual no festival iberoamericano da canción, OTI, no ano 1972. En varias ocasións gañaron o Festival Rexional de Coros e Danzas, onde foron distinguidos como mellor grupo folclórico nacional, mellor grupo de gaitas e mellor parella de baile. Aurora Bastos lembrou tamén que o Grupo Folclórico de Redondela forma parte da historia da Coca.Nos antos 70 foron os encargados de representar a Danza das Espadas, e ante a falta de homes para completar as figuras a danza contou tamén con participación feminina “por primeira vez en séculos”. Con este pregón arrancou a festa máis identificativa de Redondela, na que os veciños e veciñas son protagonistas, xa que son eles os encargados de manter vivas as tradicións das alfombras florais e dos bailes. O Concello quixo así render homenaxe a algunhas das persoas que durante anos fixeron posible esta festa. Nesta edición o recoñecemento foi para Manuel Araújo, que durante anos participou na Danza das Espadas, e as alfolbristas María Dolores Otero López, Ángeles Virulegio González e Josefa Iglesias Crespo. Tamén recibiron a homenaxe do Concello os familiares de Esther Sánchez Míguez, xa falecida, e que durante décadas se encargou de elaborar os traxes de xigantes e cabezudos, dos “avós” e tamén das Burras e as Penlas. A xornada contou tamén coa acto solemne de relevo das penlas, no que Ainhoa Iglesias e Alexia Álvarez cederon o gorro a Laura Álvarez e Alba Figueroa. Pola súa banda Daniela Novelle e Bea Vilaboa como novas penlas recibiron tamén as súas “ás”, coas que protagonizaron o seu primeiro baile. No acto, o alcalde de Redondela, Javier Bas, xunto as concelleiras de Eventos e Cultura, Ángela Antón e Teresa París, agradeceron a participación dos veciños nas diferentes tradicións que fan das Festas da Coca unha celebración “única no mundo”.
Marisa González amósase honrada por seren os elexidos para ler o pregón e desexa aos veciños que gocen destas festa.
Aurora Bastos lembrou que a Agrupación Folclórica tamén forman parte da historia da Coca. O grupo bailou na Danza das Espadas incorporando tamén mulleres por primeira vez na historia.
As concelleiras salientan a importancia das Festas da Coca para os redondeláns.
