Hoxe é Venres 23 de Outubro de 2020

As carencias nos colexios de Santa Mariña e Quintela enfrontan ao PP coa oposición

RR_Noticias

Non é a primeira vez nin parece que vaia ser a última. No último pleno municipal abordouse unha vez máis dúas demandas que veñen de lonxe e que afectan aos colexios públicos do municipio. Concretamente ao Colexio de Santa Mariña, centro que carece de patio cuberto “o que supón que o seu alumnado, máis de 400 alumnos, non poida saír ao patio nos días de chuvia”. No caso de Quintela a comunidade educativa segue esperando que se substitúa a súa cuberta, construída con amianto “material potencialmente perigoso” e que fora reparada “provisionalmente” logo de que os temporais do ano 2011 levantaran parte dese tellado.

Dúas reclamacións que chegaban a pleno da man do PSOE. O seu voceiro, Eduardo Reguera era o encargado de trasladar a demanda ao resto da corporación solicitando o seu apoio para lle esixir a Xunta que acometa estas obras. Numerosas iniciativas e mobilizacións, mocións, recollida de sinaturas, concentracións ante o concello preceden a esta nova petición que era aprobada por unanimidade. O concelleiro Enrique Fojo salientaba na súa intervención o “abandono das institucións por deixar de investir nos colexios públicos a favor dos privados”. No mesmo sentido manifestábase o nacionalista Xoán Carlos González quen entende que “a política do PP busca deteriorar o ensino público”. En referencia ao Colexio de Quintela, que segue co tellado construído con amianto malia tratarse de “material potencialmente perigoso”, aventuraba o edil que o obxectivo da Consellería é pechar o centro a medio prazo. Falaba tamén de “represalia” por parte da Xunta cara estes centros “cuxas ANPAS téñense mobilizado e ven como se lle negan investimentos”. Dende AER, Ricardo Figueroa aplaudía tamén a proposta que de xeito periódico chega ao pleno sen que se obteñan resultados positivo. Os populares malia votar a favor da moción do PSOE, rebaixaron a urxencia de cambiar a cuberta do colexio de Quintela xa que “logo de reunirnos coa dirección do centro en ningún momento se nos trasladou como prioritaria a substitución do tellado e si outras cuestións como o servizo de comedor ou o servizo de autobuses”. Negaba tamén Carmen Amoedo ningún tipo de represalia por parte da Xunta “no Colexio de Santa Mariña veñen de investir 30.000 euros para ampliar a zona de patio”. Na súa intervención final Reguera volvía insistir na necesidade de acometer dúas obras “cuxo custe non é tan elevado” e criticaba que dende o PP se invistan grandes cantidades en financiar o ensino concertado e privado e non se acometa obras como as demandadas.  

Eduardo Reguera PSOE
O socialista solicitaba o apoio do resto dos grupos para acometer melloras en ambos os dous colexios
Enrique Fojo edil non adscrito
Criticaba os investimentos no ensino privado e concertado en detrimento do público
Xoan Carlos González BNG
O nacionalista falaba de represalias cara os centros que se mobilizan
Ricardo Figueroa AER
A agrupación de electores lembraba aos populares que levan seis anos pedindo estas melloras sen que se teña feito nada
Carmen Amoedo PP
Os populares rexeitan a urxencia do cambio na cuberta do Cole de Quintela

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *