Hoxe é Martes 20 de Outubro de 2020

“É necesario intervir para evitar que os problemas de aprendizaxe deriven en fracaso escolar”

RR_Noticias

O 6% dos rapaces en idade escolar padecen problemas de lectura, escritura ou cálculo. Dificultades que poden derivar en fracaso escolar no caso de que non se detecte o problema e se adopte un método de aprendizaxe axeitado que corrixa a situación. De como detectar estes problemas e que ferramentas empregar para resolver as dificultades coas que se enfrontan os rapaces falará esta tarde na biblioteca de Arcade a psicóloga Johana Argüeso, nunha charla que impartirá ás 18:00 horas.

Psicóloga especializada nas áreas Social e Educativa, Argüeso explica que hai indicios que poden indicar a existencia deste tipo de problemas xa en idades temperás “por exemplo, o feito de que un neno non fale con 2 anos” con todo, engade que “non será ata os 5 ou 6 cando se poida determinar o trastorno, cando os rapaces comezan a ler e escribir e amosan problemas”. Neste sentido apunta como síntomas a ter en conta o feito de que escriba con letras de diferente tamaño nunha mesma palabra, imposibilidade para manter liñas rectas, silabear en exceso á hora de ler.. serían tan só algúns dos indicios que nos poden indicar que estamos ante un neno que padece un problema de aprendizaxe. Trátase de problemas neurolóxicos leves e selectivos que poden ser corrixidos cun bo método, continuado e eficaz de ensinanza. Por iso o máis importante é detectalo canto antes, para evitar que estes problemas deriven en fracaso escolar. Johana Argüeso abordará esta cuestión nunha charla que se impartirá ás 18:00 horas de hoxe na biblioteca de Arcade, nunha conferencia coloquio na que se dedicará un apartado específico á dilexia, problema maioritario dentro dos trastornos da aprendizaxe. Malia que se ten avanzado notablemente na detección e tratamento destes problemas aínda se producen situacións indesexables que fan que nenos con dificultades de comprensión porque lles falla a capacidade para ler ou escribir acaben etiquetados como “nenos vagos”. Na charla de hoxe todos os que o desexen poderán achegarse, preguntar e incluso consultar con esta psicóloga casos concretos.  

Johana Argüeso Psicóloga
Transtornos que afectan a capacidade do neno para escribir ler e facer cálculos
Síntomas
Adoitan detectarse aos 5-6 anos
Non etiquetar como nenos vagos
Moitas veces son rapaces con problemas de aprendizaxe

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *