Nove persoas participaron do curso de Dinamización Cultural e Tempo Libre, enmarcado dentro do obradoiro de emprego “Emprega Verde” do Concello de Redondela, desenvolvendo un completo programa cultural con actividades para os nenos en colexios e bibliotecas así como actividades de rúa e facilitando que preto de mil persoas de diferentes colectivos e asociacións se achegaran á Illa de San Simón e coñeceran a súa historia. O obxectivo agora é atopar emprego neste sector.
“Aprender facendo” podería ser a máxima empregada polos alumnos da especialidade de Dinamización Cultural e Tempo libre que nos últimos meses se está a impartir no obradoiro de emprego “Emprega Verde” do Concello de Redondela. Baixo a dirección da monitora Elena Domínguez, os alumnos desenvolveron un completo programa cultural e educativo, que incluíu actividades para os nenos con sesións de contacontos, obradoiros de Nadal e actividades de dinamización na rúa. Con todo, o “proxecto estrela” foi un completo programa turístico orientado a divulgar a riqueza cultural da enseada de San Simón. Unha actividade orientada a asociacións e colectivos que facilitou o achegamento de case mil persoas á Illa de San Simón. Manuel Ferradáns, un dos alumnos deste obradoiro, explicaba o satisfactorio destas actividades que lles permitiron traballar con nenos e maiores. Uns alumnos que valoran positivamente a experiencia, aínda que lamentan que o curso non sexa de maior duración xa que aos seu entender “seis meses non é tempo suficiente para afondar en todos os contidos do curso” segundo explicaba Mónica Varela. O obxectivo último destes obradoiros de emprego é lograr a inserción no mercado de traballo destes “alumnos-traballadores” que ven na dinamización cultural e nas actividades de tempo libre e de promoción turística unha posible saída laboral. Con todo, malia sentirse mellor preparados e máis cualificados que antes de iniciar o curso, son conscientes do difícil que o teñen nun mercado moi amplo pero que presenta tamén unha elevada competencia. Seis meses de formación que a monitoria entende “un punto de partida que permite a este alumnado contar cunha maior capacitación de cara a buscar unha saída laboral nun sector que abarca un campo de traballo moi amplo”. A coordinadora do obradoiro Emprega Verde, Loli Daviña lembra que tamén está apiques de rematar a outra especialidade na que se formaron 13 alumnos, un curso de agricultura ecolóxica que se desenvolveu no Pazo de Pousadouro.
Fálanos da experiencia vivida coa organización das visitas turísticas á Illa
Lamenta que o curso non sexa dunha maior duración
Anima ao alumnado a seguir formándose e a loitar por traballar no sector
Fálanos das dúas especialidades impartidas
