Hoxe é Venres 30 de Outubro de 2020

A oposición cualifica de “cortina de fume” unha moción do PP contra o terrorismo en Galicia

RR_Noticias

A moción presentada polo PP contra o terrorismo de Resistencia Galega foi rexeitada cos votos en contra de todos os grupos da oposición que cualificaron a moción de “despropósito” ou “paripé”. Un longo debate no que os argumentos da popular Teresa París, encargada de defender a proposta, non convenceron a ningún dos grupos da oposición.

O pleno rexeitaba na sesión celebrada o pasado xoves a moción que os populares están a presentar en todos os concellos galegos na que solicitan a condena conxunta de todos os grupos “fronte ao terrorismo en xeral e especialmente “o practicado pola organización Resistencia Galega”. Socialistas e nacionalistas así como o edil da Agrupación de Electores, amosaron o seu rexeitamento unánime a calquera acto de terrorismo e incluso propuxeron apoiar a moción no caso de que o acordo condenase o terrorismo en xeral eliminando as referencias a agrupación Resistencia Galega, unha proposta que chegaba dende o PSOE a través do edil Luís Orge Dende o BNG, Cecilia Pérez criticaba que “o PP estea a usar este tema para demonizar a determinadas organización políticas e sociais” e cualificaba de “despropósito e cortina de fume” a presentación da moción. O edil de AER, Alfonso Blanco aproveitaba para lembrarlles aos populares que dende a súa formación “non se está a actuar coa mesma contundencia ante algúns mozos de Nuevas Generaciones que está a facer apoloxía do terrorismo loando o réxime franquista” e poñían sobre a mesa os datos que abalan “a escasa preocupación existente entre a poboación ante a ameaza terrorista”. A popular Teresa París defendeu a moción pola necesidade de condenar o terrorismo “en todas as súas manifestacións” e asegurou que o seu grupo a expón agora “porque coincide co momento no que os mozos de Resistencia Galega están a espera dunha sentencia”.  

Luis Orge PSOE
Os socialistas pedían un cambio no téxto da moción
Cecilia Pérez BNG
Os nacionalistas cualificaron a proposta de despropósito
Alfonso Blanco AER
O edil lembrou que o terrorismo non ocupa un lugar salientable entre as preocupacións dos galegos
Teresa París PP
Os populares insistían no pertinente de presentar agora este proposta

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *