Hoxe é Venres 23 de Xullo de 2021

Redondela é a única zona de Galicia con todos os polígonos de bateas de mexillón abertos

RR_Noticias

O 80% dos polígonos de bateas de mexillón están pechados nas rías galegas, e a de Vigo é que presenta unha mellor situación, xa que é a menos afectada polo episodio de marea vermella. No caso do litoral redondelán todos os polígonos de mexillón están abertos, un total de cinco, e un máis de ostra, o que reflicte que o episodio de toxina está a remitir.
 

A ría menos afectada é a de Vigo, onde dos 13 polígonos que hai, oito están abertos -todos os de Redondela, un en Vigo e outro en Cangas-. Do resto non se pode extraer molusco debido á presenza da toxina, segundo datos do Instituto Tecnolóxico para o Control do Medio Mariño (Intecmar). Os primeiros peches producíronse a principios de xullo en Cangas e pronto se expandiron por Vigo e Redondela, todos na Ría de Vigo, pero a situación empezou a mellorar hai uns días. No entanto, hai dous polígonos (Cangas F e G) que permanecen clausurados desde fai máis de catro meses, desde o 2 de abril. Na ría de Pontevedra están todos pechados, igual que en Baiona, a ría de Muros-Noia, Corme-Laxe, e a inmensa maioría dos polígonos de Arousa e de Ares-Betanzos. A “marea vermella” é un fenómeno natural que se produce por microalgas presentes no fitoplancto mariño e que baixo condicións ambientais favorables -como o bo tempo- multiplícanse. É a chamada toxina PSP, que é paralizante e que pode provocar no consumidor molestias de tipo intestinal como vómitos, mareos e náuseas. O mexillón que está no mercado pódese consumir sen risco algún para a saúde porque non procede das bateas que están afectadas e, por tanto, chega aos fogares polas canles regulares de comercialización polo que ten garantía de salubridade.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *