A profesora de historia Teresa Tojeiro pregoeira das Festas da Coca

A orquestra Olympus abre o programa nocturno con verbena na noite do mércores dentro dunha programación na que non faltarán as citas tradicionais coas alfombras florais e a Danza das espadas e as Penlas así como as actividades orientadas aos máis pequenos coa “Coca dos nenos” na Alameda.

Coa vista posta no ceo arranca mañá a programación da Festa da Coca cos tradicionais pasarrúas ás 17:30 horas a cargo da banda de Música de Redondela e o desfile de Xigantes e cabezudos media hora despois. O pregón ás 20:00 horas correrá a cargo da profesora de historia Mª Teresa Tojeiro, dentro da política iniciada anos atrás por parte da Concellerái de Cultura e que prevé que sexan veciños e veciñas de Redondela os encargados deste acto institucional. A continuación a Orquestra de saxos ofrecerá un concerto na Alameda e pola noite se procederá á elaboración das alfombras florais. Tamén mañá terá lugar a actuación da Orquestra Olympus, considerada unha das formacións deste estilo máis salientables do panorama musical galego. A verbena arrancará ás 22:00 horas. O xoves do Corpus, día grande en Redondela onde se mantén o festivo local, a xornada vivirá a cita obrigada coa Danza das espadas e as penlas ás 13:00 horas co tradicional baile na praza da Constitución a unha da tarde, logo de que a procesión percorra as rúas decoradas coas alfombras florais. Xa pola tarde haberá citas deportivas na Pista da Xunqueira e arrancará a Coca dos nenos con actividades tanto o xoves como o venres na Alameda con ludotecas, actividades circenses e teatro a partir das 17:30 horas. A verbena o xoves correrá a cargo da Orquestra Capitol. Dende a Concellería de cultura destacan a recuperación a cargo do musicólogo Javier Jurado dunha peza composta por Reveriano Soutullo para as marchas procesionais e que se poderá escoitar interpretada pola Banda de música de Chapela na procesión do domingo.