Hoxe é Luns 26 de Outubro de 2020

A Ría de Vigo supera o exame dos eurodeputados

RR_Noticias

Así o sinalou o presidente da delegación, Philippe Boulland, despois de visitar a ría de Vigo e a zona de Rande xunto co resto de representantes da UE. Con eles estiveron os alcaldes dos Concellos da ría, tamén o redondelán, Javier Bas, e membros de asociacións como a Plataforma pola Defensa da Enseada San Simón, que lle expuxeron aos eurodeputados a situación da ría e os problemas que sofre, á vez que lamentaron a “falta de tempo”para que visitaran zonas como a enseada.

O presidente da delegación sinalou que as cousas están “ben encamiñadas” pero precisou que elaborarán un informe sobre as rías galegas que se dará a coñecer en maio. Na viaxe en barco pola ría os eurodeputados atenderon as explicacións dos peticionarios da Plataforma da Enseada de San Simón, Plataforma en Defensa da Ría de Vigo e A Ría non se vende, que tentaron mostrarlles o estado das augas, aínda que a mala climatoloxía complicou a tarefa. Antonio Lores, presidente da Plataforma en Defensa da Ensenada San Simón, valorou a visita dos eurodeputadas dun xeito “agridoce”. Entende que é moi positivo que a UE se desprazase para coñecer a situación da ría e escoitar as súas demandas, pero lamenta que non levaran unha imaxe “real” da situación. Lores pon o exemplo da depuradora de Vigo, que habitualmente emite vertidos polo seu emisario, pero que ante a visita “xa anunciada” dos eurodeputados, os xestores no día de onte tiñan todo “en perfecto estado”. Denuncia que a visita estivo “mal organizada” por parte do Concello de Vigo e a Xunta de Galicia. Critica que se fixeran visitas pouco relevantes para ver “a maqueta” da nova depuradora ou un percorrido en autobús polo Lagares, e que despois non quedara tempo para que os eurodeputados visitaran a Enseada de San Simón. O presidente do colectivo insistiu nas irregularidades que se dan na ría de Vigo, como a presenza do recheo de formigón preto do estreito de Rande, a almacenaxe de colectores e a actividade da empresa Aucosa, que produce fariñas de peixe. Lores agarda que esta visita dos eurodeputados e a documentación presentada pola plataforma sirva para que a UE tome as decisións correctas. Sinala que o único que piden é que as empresas ubicadas na enseada de San Simón se trasladen a un polígono industrial e cumpran así coa normativa en vigor. O alcalde redondelán Javier Bas lamentou tamén a falta de tempo “para exporlle os representantes europeos os principais problemas que sofre o noso litoral”, e que afecta aos fondos mariños, areais e as zonas de marisqueo. Philippe Boulland sinalou que os membros da comisión recolleron na primeira xornada as preocupacións dos cidadáns, derivadas do nivel de calidade das augas, o seu efecto sobre a pesca e o marisqueo e tamén por problemas de cheiros. Todo isto, constatou, é consecuencia “dun desenvolvemento económico lexítimo pero que se ten que equilibrar cun desenvolvemento sustentable”.  

Antonio Lores presidente Plataforma en Defensa da Enseada de San Simón
Lores queda cun sabor agridoce logo da visita dos eurodeputados.
Avaliación sen datos reais
Lores lamenta que os eurodeputados non puideran ver a situación real da ría e visitar a Enseada de San Simón.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *