Hoxe é Sábado 31 de Outubro de 2020

Afectados pola AP-9 agardan un apoio “real” do Concello e a convocatoria de mobilizacións masivas

RR_Noticias

Todos os partidos políticos da corporación asinaron xa un manifesto en contra da ampliación da autoestrada ao seu paso por Chapela. Nun pleno extraordinario que se celebrará o próximo luns votarase unha moción para deixar patente o apoio do Concello aos afectados. Agora os veciños esixen que se pase “das palabras aos feitos” e que tanto o goberno local como o resto de grupos e colectivos veciñais e sociais se mobilicen xuntos contra o proxecto do Ministerio de Fomento.

A ampliación de carrís na autoestrada afectaría directamente a 14 vivendas, un colexio e 3.500 metros cadrados de terreos privados, ademais de incrementar a contaminación ambiental e acústica que xa sofren os veciños da parroquia. Rafael Baltasar Cela, presidente dos afectados, lembra que desde hai meses agardan que os reciba a ministra de Fomento. Ana Pastor, tanto durante a campaña electoral en novembro de 2011, como despois de ser nomeada ministra, manifestou o seu rexeitamento á ampliación da autoestrada, pero hai unhas semanas sorprendeu á plataforma anunciando un acordo con Audasa, concesionaria da autoestrada, no que se incluía entre outros proxectos esa ampliación. Ademais de rexeitar a ampliación tamén solicitan “contrapartidas” para Chapela e Redondela, como a supresión da peaxe de Rande, para compensar ós veciños que levan décadas castigados por infraestruturas como a autoestrada, a estrada nacional, a estrada autonómica e o ferrocarril. Sinalan ademais que o tramo da AP-9 entre Vigo e Rande debería considerarse “un tramo urbano”, como unha circunvalación da cidade olívica “libre de peaxe”. A Plataforma tamén solicita ao Concello de Redondela a realización de todas as accións legais posibles para evitar a ampliación da AP-9 ao seu paso polo municipio.    

Rafael Baltasar Cela presidente
Agardan que os grupos da corporación e as asociacións se unan nunha manifestación conxunta.
Reunión con Ana Pastor
Os afectados levan meses agardando unha xuntanza coa ministra.

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *