Desde o 7 e ata o 17 de agosto estará no Multiusos da Xunqueira esta instalación itinerante. Grazas a ela o público de todas as idades poderá coñecer os misterios do universo que nos rodea, as galaxias, as constelacións, o paso das estacións ou as estrelas. O horario é de 10.30 a 13.30 horas.
A actividade consiste en observar e coñecer o ceo a través de diferentes proxeccións dentro dunha gran cúpula inchable instalada no Multiusos da Xunqueira. A través das proxeccións tratarase de fomentar o coñecemento da natureza dende diferentes ópticas e achegar a astronomía e a súa utilidade para a vida cotiá a todo o público, aprender a orientarnos observando o ceo e identificar as principais constelacións. A concelleira de Servizos Sociais, Teresa París, salienta que se trata dunha actividade moi recomendable “para toda a familia”, na que pequenos e maiores poden “aprender cousas e sorprenderse” cos segredos do universo. A actividade é gratuíta e desde o Concello animan a toda a veciñanza a que se achegue cos nenos “a aprender máis sobre a observación do ceo” dun xeito divertido. As proxeccións teñen unha duración de 15 minutos e faranse tres cada día, ás 10.30 horas, 11.30 horas e 12.30 horas, ata encher o aforo (20 persoas). A iniciativa ponse en marcha grazas á colaboración entre a Concellaría de Servizos Sociais e a Obra Social “la Caixa”. Para máis información pódense dirixir ao CIM (Centro de Información ás Mulleres), na rúa Isidoro Queimaliños, núm. 2 , ou chamando ao 986 40 80 43. Tamén nas oficinas de Servizos Sociais e Igualdade de Chapela, nos baixos do Pavillón de Deportes, ou chamando ao 986 45 89 93.
Unha oportunidade de coñecer máis cousas do universo que nos rodea.
París convida ao público a achegarse a esta actividade
