Hoxe é Luns 19 de Abril de 2021

O Choco cumpre co obxectivo en Nigrán

RR_Noticias

Aitor Gómez, por partida dobre, foi o anotador do equipo redondelán, que conseguiu superar un marcador en contra, logo de que os anfitrións marcaran o primeiro gol do partido. A vitoria permite ós de Jacobo Montes seguir na segunda praza da Preferente Autonómica, que dá acceso ó ascenso a Terceira.

Preferente Autonómica
Nigrán 1-2 Choco
O Nigrán adiantouse no marcador no minuto 26, nun encontro no que os locais plantaron cara ó equipo redondelán. Pero en pouco máis de dez minutos un gol de Aitor Gómez puxo ós anfitrións no seu lugar, co empate 1-1. A ningún dos dous equipos lle valía o empate, xa que o Nigrán busca salvar a categoría e o Choco non abandonar os postos de cabeza. Por iso na segunda parte ningún dos dous equipos se daba por satisfeito. O Nigrán apertou arriba e o Choco non perdoou. Manu Lojo conseguiu levar un balón que, aínda que se topou coa parada de Manu, despois Aitor enviou o rexeite ó fondo da portería. Era o minuto 70 e o 1-2 sería o marcador final. Os tres puntos deixa ós de Jacobo Montes na 2ª praza. A próxima fin de semana volven xogar fóra da casa, no campo do Ourense B, o pechacancelas do grupo. E non poden fallar, xa que o seu seguidor, o Céltiga, está a tan só un punto.
Primeira Autonómica
Bahía 2-1 Chapela
O Chapela non foi quen de superar ó Bahía, e afúndese na metade baixa da táboa. A próxima fin de semana reciben ó Domaio, da metade alta da táboa.
Segunda Autonómica
Arcade 2-1 A Lama
Os de Soutomaior conseguiron superar a un dos seus rivais directos pola permanencia, o conxunto da Lama. Con todo os de Jonathan Álvarez seguen no pozo da clasificación. A próxima fin de semana xogan no campo do Cuntis (7º)
Terceira Autonómica
Choco B 3-0 Atl. Matamá
O filial do Choco non perdoou a un dos equipos da parte baixa da táboa e impúxose con claridade ó Matamá. Manteñen así a 6ª praza, e a próxima fin de semana xogan no campo do Moledo, da parte baixa do grupo.
Chapela B 0-0 Moledo
Reparto de puntos entre dous dos equipos da parte baixa da táboa. Os de Chapela xogarán o próximo domingo en Nigrán, dous postos por riba dos redondeláns.
Cháin 2-0 At. Vilar
Os redondeláns non foron quen de superar ó Chaín, que se mantén segundo do grupo. Os redondeláns caen á metade baixa da táboa, e a próxima fin de semana reciben ó Mosende, pechacancelas do grupo.
Cesantes 3-2 Praderrei
Estaba previsto que fora un partido de moita igualdade e non decepcionou, con moitos goles, e a balanza caeu a favor dos locais, que se impuxeron ó Praderrei por 3-2. O Cesantes mellora posicións na táboa, e a próxima xornada xoga no campo do Santomé, un dos conxuntos máis fortes do grupo.
Presqueiras 2-3 Soutomaior
Non fallou o Soutomaior, e impúxose ó Presqueiras, un dos pechacancelas do grupo, aínda que con máis dificultades do previsto. Os de Soutomaior son segundos, e o domingo reciben ó Cruceiro B, da metade baixa da táboa.
Nespereira 1-1 Castelo
Reparto de puntos no partido dos de Pazos, que manteñen o 5º posto do grupo. O domingo xogan no campo do Cañiza, situado dous postos por riba do Nespereira.
Fútbol Sala – Autonómica Sur
Redondela F.S. 3-3 Valadares
Reparto de puntos na bomboneira de Redondela nun encontro que non estivo exento de polémica, e no que o adestrador local, Nolichi, foi expulsado por dirixirse ó árbitro para protestarlle unha actuación. O empate deixa ós redondeláns na 9ª posición da táboa. A próxima fin de semana disputarán un partido de moita rivalidade, xogarán na pista do S. Martiño, equipo situado un posto por riba do Redondela F.S e que os avantaxa en tan só dous puntos.
 

Share on facebook
Facebook
Share on twitter
Twitter
Share on linkedin
LinkedIn
Share on pinterest
Pinterest
Share on whatsapp
WhatsApp

Deixa unha resposta

O teu enderezo electrónico non se publicará Os campos obrigatorios están marcados con *