Unhas rebaixas con pouco tirón en Redondela

Logo de cumprirse case unha semana do inicio das rebaixas de xaneiro, o comercio de Redondela está lonxe de sufrir avalanchas. Se ben na xornada inaugural do sábado houbo bastante actividade no comercio local, ó longo da semana as ventas foron “frouxas”. Os veciños quéixanse de que os produtos de calidade teñen “pouco desconto” e que as prendas con rebaixas importantes son “tallas soltas ou artigos de temporadas pasadas”.

Hai seis días que comezaron as rebaixas en Galicia, e en Redondela fixérono timidamente. Se ben na xornada do sábado houbo bastante actividade no comercio local, ó longo da semana as ventas foron máis ben “frouxas”, segundo apuntaban desde diferentes comercios de roupa e calzado da vila. Lorena, que é dependente nunha tenda de moda, explica que se nota a crise, e que as ventas están a ser “menores que o ano pasado”. Da mesma opinión é Belén, que rexenta un establecemento de moda e complementos, ela constata que “cada ano baixan as ventas”, e a clientela busca os artigos “máis económicos”. E estas baixas expectativas de ventas dos comerciantes teñen o seu reflexo na opinión dos veciños de Redondela. Porque aqueles cos que tivemos ocasión de falar, aínda non mercaran nada, ou moi pouco, neste período de rebaixas. A maioría deles opina que mercar neste período de descontos “non vale moito a pena”. María entende que se aforra pouco, porque nos produtos de calidade “case non hai rebaixas”, e ademais está o problema de que “poida que xa non atopes o modelo ou a talla que queres”. Outro veciño, Francisco, non ten pensado mercar nada nas rebaixas. Prefire comprar o que precisa en temporada, porque logo poida que non atope a súa talla, ou “que a rebaixa sexa tan pequena que non pague a pena agardar”. Para Belén as campañas de rebaixas son tamén “algo de trampa” para os consumidores, e aínda que ela sempre adoita mercar algo, asegura que as “gangas” non existen. Afirma que os bos produtos case non teñen rebaixa, e que os que teñen máis desconto xa “son prendas de temporadas pasadas”. E Sonia lanza unha mensaxe para o comercio local, anímaos a facer “maiores descontos”. Na súa opinión nos comercios de cidades como Vigo ou Pontevedra as rebaixas son maiores, dun 40% ou 50%, mentres que nas tendas redondelás non superan o 10% ou o 25%.Segundo as estimacións das Asociacións de Empresarios, cada galego gastará unha media de 84 euros nas rebaixas de xaneiro deste ano 2012, o que supón seis euros máis que os 78 euros de media investidos no mesmo período de 2011.