A SAR xogou ben e foi rival para un contrincante difícil pero a actuación arbitral non llelo puxo doado aos xogadores de Redondela nun encontro que rematou co resultado de 34-36 a favor dos xogadores do Zamora. O Chapela non defraudou e acadou unha nova vitoria ante o Cisne, nun partido axustado co marcador final de 32-31.
A SAR perdeu na bomboneira por tan so dous goles nun encontro onde o protagonismo foi tamén para a actuación arbitral, xa que os xogadores do equipo redondelá, que amosaron o seu mellor xogo no partido do sábado ante o Zamora, entende que foi clave na súa derrota a actuación da parella arbitral.
Con todo, a Sar Plastic Omnium plantoulle cara ao rival, un equipo moi superior como o amosa a súa segunda posición na táboa, e perderon por tan só dous goles un encontro que rematou co resultado de 34-36 a favor dos visitantes.
Un mal resultado para o equipo local que se afunde na categoría. Dende esa penúltima praza desprázanse na vindeira xornada ao campo do Seis do Nadal.
Pola súa banda, o Paraxe Chapela volveu gañar no encontro disputado o sábado, con todo viviron un final de infarto onde a falta de tan só dez segundos para o remate do partido o Cisne tivo nas mans de Iván Abilleira o gol do empate. Por sorte para o Paraxe o seu contrincante non foi quen de arrancarlle ningún punto e a vitoria quedou en Chapela co axustado marcador de 32-31
Unha vitoria que permite ao Paraxe ascender un posto na categoría ata situarse na cuarta praza. Na vindeira xornada desprázanse ao campo do Lalín.
