A SAR Rodavigo comezou a súa andaina na División de Honra Prata feminina cunha importante vitoria a domicilio ante o UB Lavadores, recentemente ascendido á categoría. O conxunto redondelán impúxose por 20-22 nun encontro moi igualado e no que tivo que remontar na segunda metade para sumar os dous primeiros puntos da tempada. Na próxima xornada chegará a estrea da SAR Rodavigo na casa, no pavillón municipal da Bomboneira, onde recibirá ao Balonmano Gran Canaria.
O partido estivo marcado pola igualdade desde os primeiros minutos, con ambos os equipos disputando cada balón e sen que ningún conseguise abrir diferenzas importantes. O UB Lavadores chegou ao descanso por diante no marcador, cun axustado 11-9, deixando todo por decidir para a segunda metade.
Tras o paso polos vestiarios, o encontro mantivo o mesmo guión, con continuas alternativas e máxima intensidade. A SAR Rodavigo conseguiu darlle a volta ao marcador e situarse por diante no minuto 47 (16-17), aínda que o conxunto local non baixou os brazos. Nos minutos finais, as redondelás estiveron máis acertadas e souberon xestionar mellor os momentos decisivos para asegurar a vitoria por 20-22.
Resultados da Copa Federación: Chapela leva o primeiro derbi da tempada ante a SAR
O Balonmán Chapela impúxose por 26-29 á SAR Impernoroeste no primeiro derbi da tempada entre os dous conxuntos redondeláns, disputado este sábado na Bomboneira no marco da Copa Federación. O encontro estivo marcado pola igualdade inicial, unha forte reacción das locais na segunda metade e a capacidade das visitantes para controlar os minutos decisivos e asegurar unha importante vitoria.
O partido comezou cunha máxima igualdade, como reflectía o 6-6 no minuto 11. Porén, o Balonmán Chapela conseguiu aumentar o ritmo antes do descanso e abriu unha vantaxe que lle permitiu chegar aos vestiarios con sete goles de renda (10-17). A SAR Impernoroeste non baixou os brazos e saíu con outra cara tras o paso polos vestiarios, reducindo progresivamente as diferenzas e devolvendo a emoción ao derbi.
As locais chegaron a situarse a só dous goles (19-21), poñendo de novo o encontro nunha situación de máxima igualdade. O Chapela, con todo, soubo manter a calma no tramo decisivo e xestionar a súa vantaxe para acabar levando o derbi por 26-29. Un triunfo que lle permite ao conxunto visitante saír reforzado dun dos partidos máis sinalados desta fase da Copa Federación, mentres que a SAR Impernoroeste deixa unha boa reacción tras unha primeira metade na que lle custou atopar o seu ritmo.
O derbi chegaba, ademais, despois dun venres tamén esixente para a SAR Impernoroeste, que apenas 24 horas antes tivera que enfrontarse ao Balonmano Porriño. As redondelás caeron por un axustado 22-20 nun partido tamén moi igualado.
Pola súa banda, as Choqueiras de Redondela quedaron eliminadas da Copa Federación o pasado 4 de outubro tras caer ante o Balonmán Samertolameu por 29-17. Deste xeito, o conxunto redondelán despídese da competición, mentres que SAR Impernoroeste e Balonmán Chapela continúan na loita por alcanzar a final.
Aínda está todo por decidir na Copa Federación, xa que tanto a SAR Impernoroeste como o Balonmán Chapela terán que afrontar o seu último cruce o próximo 10 de outubro. A SAR desprazarase á pista do BM Lalín, mentres que o Balonmán Chapela recibirá o BM Caselas. Os dous encontros determinarán os equipos que se clasificarán para a final.
